Er Framsókn á móti spillingu?????

Öðruvísi mér áður brá. Eru Framsóknarmenn í Kópavogi í alvöru að setja sig upp á móti því að dóttir Gunnars fái eitthvað í sinn hlut fyrir að þurfa að vera dóttir hans. 5 millur á ári finnst mér bara sanngjarnar skaðabætur fyrir athyglisleysið og góða nótt kossana sem aldrei fengust. Og svo er ekki við hana að sakast að eitt af verkum hennar hafi ekki verið gefið út. Ég veit ekki betur en að annar mætur landsfaðir hafi þurft að útvega syni sínum dómaraembætti til að bæta fyrir langar og strangar stundir án föðurímyndarinnar sem þjóðin hafði óskipt til afnota þá.

En fyndnin í fréttinni er að Framsóknarflokkurinn hafi áhyggjur af því að hugsanlega sé verið að hygla stúlkunni.  Má ég benda Framsóknarmönnum á tvö nöfn: Finnur Ingólfsson og Alfreð Þorsteinsson. Kannið þið þá og þeirra verknað 15 ár aftur í tímann og ræðum svo spillingu.

Ræddu hugsanleg meirihlutaslit

Er Össur að brenna yfir?

Fyrir þá sem ekki vita er IMF eða alþjóðagjaldeyrissjóðurinn að fjármagna þessa herferð stjórnarhers Sri Lanka gegn Tamíl tígrunum með ef ég man rétt um 2 milljörðum bandaríkjadala eða sambærilegu og við erum að fá að „láni“ hjá þeim. Væri ekki nær að utanríkisrurriðinn andskotaðist í sjóðnum til að taka á vandamálunum sem hann er að skapa með því að dæla fé í fallbyssur hersins sem sprengir upp saklaust fólk í boði IMF frekar en að við kaupum plástur á afsprengda útlimi saklausra borgara þessa lands?

5 milljóna neyðaraðstoð til Srí Lanka

Djöfulsins Framsóknarbull.....

Maðurinn sem framsókn sótti úr 14. sæti framboðslista síns í borgarstjórnarkosningunum var aldrei kosinn stjórnarformaður Orkuveitunnar vegna þess að hann væri faglega hæfastur. Nema þá til þess eins að moka yfir spor Alfreð Þorsteinssonar sem hefur einkarétt á mælunum sem Orkuveitan flytur til landsins. Þessum sömu og Finnur Ingólfsson keypti af orkuveitunni fyrir svipaða upphæð og hann fær í leigugreiðslur á hverju ári. Sömu mælum og ég fékk bréf um að væri eign Orkuveitunnar og þeim væri heimilt að leita til lögreglu ef ég vildi ekki leyfa Finni að lesa af þeim.

Orkuveitan undir stjórn Alfreðs hækkaði verðskrána í hittifyrra ef ég man rétt vegna þess að miklir hitar orsökuðu minni notkun. Nokkuð sem minnisvarði Alfreðs, flugmóðuskipið sem hann lét byggja undir starfssemina mátti ekki við. Enda komið milljarða yfir kostnaðaráætlanir.

Framsóknarfnykinn þarf að komast yfir og það verður hvorki gert með reykelsum eða nýjum front samberandi glottandi nýtt formannsandlit þessarar hagsmunaklíku. Það verður gert með klór og því að upplýsa um hagsmunaspillingarferlið sem hefur ráðið ríkjum í landinu. Þá eiga margir eftir að sýna sitt rétta andlit. 

Með Búrfellsvirkjun var þeirri karamellu fleygt í þjóðina að raforkuverð til heimilanna myndi lækka. Það reyndist bull. Núna td. með því að gera Hitaveitu Suðurnesja að HS veitum og HS orku er verið að stórauka kostnað neytenda. Þessum rottugang gráðugra verður að linna. 

Verður að virða umsaminn trúnað

Velferðin varin??????????

Í fréttatilkynningunni sem forsætisráðherra sendir frá sér segir ma. þetta um skuldastöðu heimilanna:
„Ríkisstjórnin leggur mikla áherslu á að verja heimilin í landinu og velferðina sömuleiðis. Það
verður gert með því að fylgjast grannt með skuldastöðu almennings og grípa til ráðstafana
eftir því sem við á.“ Dettur einhverjum í hug að það að byrgja brunninn eftir að barnið er dottið sé góð aðferðarfræði?

Annars er fréttatilkynningin í heild sinni stjórnmálafrasafroða uppfull af: Skapa þarf forsendur, vinna markvisst að því, hefja mótun, blása til sóknar, leitast við að verja velferðarkerfið, Unnið verður að þjóðarsamstöðu um stöðugleikasáttmála osvfrv.

Nýja ríkisstjórnin fer af stað með það að leiðarljósi að vera sammála um að vera ósammála um ESB sem annar flokkanna heldur samt fram að sé eina leiðin fyrir okkur út úr erfiðleikunum. Hún er líka sammála um að bregðast við EFTIR að heimilin eru farin í þrot. Hún er líka sammála um að stofna sérstakt félag um öll fyrirtækin sem hún kemur til með að eignast vegna vaxtastefnu sinnar. Hún er líka sammála um að það sé gott að vera í ríkisstjórn. Í þetta tóku flokkarnir sér tvær vikur til að koma sér saman um. Á maður ekki bara að segja hrærðri röddu: Guð blessi íslensku þjóðina!

Óbreytt stjórnskipan

Ráðgjöf stórefld en úrræðin ekki?

Drakúlakynslóðin sem Steingrímur Hermannsson og svo seinna arftaki hans Davíð Oddson nærðu á sínu brjósti komu á fyrirbæri sem var gefið nafnið verðtrygging við fæðingu. Þetta fyrirbæri fæddist í jóðsótt ríkisstjórnar sem var búið að gera sér grein fyrir því að hún hafði enga stjórn á verðbólgnudraugnum sem var þá farinn að slefa yfir 100% á ári. Sem þýddi að ef þú skuldaðir  5. 000.000  álkrónur í laun í byrjun árs voru þær skuldir orðnar helmings virði í lok ársins.  Á þessum árum brunnu sparnaður fólksins sem hafði reist Ísland frá sauðskinnsskónum og torfkofunum og þetta fólk var gert slippt og snautt. Fólkið sem hefði átt að fá Fálkaorðuna fyrir að endurreisa landið frá því að vera fátæk nýlenda Dana. Fólkið sem hefði átt að vera verðlaunað að vegna dugnaðs þess og elju var framtíð þjóðarinnar björt. Fólk sem hefði átt að geta notið áhyggjulauss ævikvölds í skjóli þess að hafa skilað sínu til samfélagsins. En í ránsemisverðbólgunni sem geysaði var sparifé þessa fólks mergsogið upp til agna. Þeir sem byggðu og keyptu greiddu lága vexti langt undir verðbólgu og að endanum fengu sínar eignir nánast ókeypis. Þessa kynslóð kalla ég Drakúlakynslóðina. Þar til fyrir skömu hélt þessi kynslóð um stjórnartaumana. Helstu persónugerfingar hennar heita Steingrímur Hermannsson, erfiprins hans Halldór Ásgrímsson, Þorsteinn Pálsson, Davíð Oddsson og Jón Baldvin Hannibalsson. Ásamt málaliðum. 

Arftakar þessarar sömu Drakúlakynslóðar eru núna að segja okkur almenningi í landinu að því miður sé það á okkar herðum að borga annan samskonar glæp sem við ekki frömdum frekar en afar okkar og ömmur á sínum tíma.  EN NÚNA MEÐ VERÐTRYGGINGU OG OKURVÖXTUM! Við þessa páfugla vil ég segja ýmisslegt. Sumt ekki prenthæft. En fyrr brenni ég húsið mitt en að spila eftir leikreglum þeim sem pólitískir þjösnar bjóða. 

Það hefur alltaf verið vitlaust gefið á Íslandi. Allt frá danskri einokun. En sú einokun virðist hafa verið manneskjulegri en allt það sem íslensk stjórnvöld hafa lagt á þjóðina.  Það er sök sér að bankarnir vilji bara græða. Það er eðlilegt. En þegar farið er að höggva hendur af fólki fyrir snærisþjófnað eða það að vera ekki í skilum er minn skilningur brostinn.

Persónulega ætla ég að tækla þetta svona: Ef að bankinn og allir hinir ætla að halda áfram að þjarma að mér með  því að bæta á mig lögfræðikostnaði, dráttarvöxtum, umsýslugjaldi, stimpilgjöldum, seðilgjöldum osvfrv. hef ég eitt mótsvar. Ég kem til með að skila þeim ónýtri, rúmleg fokheldri íbúð. Hriklekri án útidyrahurða. Gott ef að ég leigi hana ekki einhverjum róna til næstu 16 ára og þinglýsi samningnum þannig að þetta verði viðurkennt fíkniefna- eða rónabæli næstu árin.

 Ég get líka rofið þakið. Eða leyft rakasveppnum að stækka. Möguleikarnir eru margir en enginn þeirra er sá að leyfa bankastofnun sem skiptir um kennitölu að hóta mér og setja á mig mörghundruðþúsundkróna lögfræðikostnað af því að hún sendi mér bréf. 

Jóhanna, Steinríkur og Gylfi eru enn við sama heygarðshornið. Svona eins og þegar Geir Haarde viðurkenndi að sjálfsagt vantaði meiri upplýsingagjöf til þjóðarinnar.  Það vantar ekkert meiri upplýsingagjöf um úrræði sem gagnast ekki. Það að fá aukafjölskyldumeðlim (greiðsluaðlögunarkommissar) í boði ríkisstjórnarinnar til að ráðstafa litlum tekjum eftir sínum kolli er ekki úrræði nema í kommúnistaríkjum.

Í Kastljósi í kvöld endurtóku allir bankastjórar ríkisbankana sömu rulluna og ríkisstjórnin. Jú, vissulega lána þeir. Á okurvöxtum. Vissulega eru til úrræði. Miðað við staðlaða meðaljónsímynd sem hefur allt sitt ENN í skilum. Þ.á.m. er sú lausn að þú borgir í 70 ár í staðinn fyrir 40.

Ég spyr bara: á maður að hlusta á þessa vitleysu áfram?  Og ef einhver pólitíkus les þennan pistil vil ég bara benda á að það eru liðnir 9 mánuðir frá hruninu. 9 MÁNUÐIR og enn er verið að „Haarda“. Mér skilst að því lengur sem það verður gert hrapar fasteignaverð og verðbólga minnkar. Kannski er það stóra efnahagsundrið sem þessi ríkisstjórn stefnir á.

Ráðgjöf verður stórefld

Þingmenn og ráðherrar verði á lágmarksatvinnuleysisbótum!

Eina leiðin til að þingmenn og ráðherrar skilji nauðina í samfélaginu er sú að setja þá á lágmarksatvinnuleysisbætur. Þeir gætu svo notað alla þessa mánuði sem þeir starfa ekki á þinginu til að vinna sér inn aukapening. Þe. ef einhver vill ráða þá.

Það er starfhæf ríkisstjórn og nægur tími til stjórnarmyndunar er viðkvæði þeirra glaðhlakkalegu ráðherraefna næstu ríkisstjórnar.  Þarna eru þau að reikna dæmin jafnskakkt og Ingibjörg Sólrún og Geir Haarde gerðu þegar þau héldu að þau gætu hummað sig í gegnum hrunið falskri söngrödd sem breyttist daglega.  Allt þar til Geir bað guð að blessa þjóðina.

Raunveruleiki ráðamanna og okkar hinna eru eins og andstæðir pólar. Veit þetta fólk ekki að þrátt fyrir alls konar tilskipanir og lög lána bankarnir engum? Hvorki einstaklingum né fyrirtækjum. Sem geta fyrir vikið ekki leyst út vörur. Vita þau ekki að það eru ekki til innihurðir í byggingavöruverslunum? Né hillujárn? Vita þau ekki að verslanir sem fá ekki fyrirgreiðslu til að leysa út vörur leggi upp laupana? Vita þau ekki að bankarnir semji ekki við neinn sem er í vanskilum?

Nýju bankarnir með nýju kennitölurnar og stundum nýju-gömlu nöfnin vilja nefnilega ekki láta frá sér fé. Það rýrir efnahagsstöðu þeirra. Ef að þessi staða bankamála er það sem ráðamenn líta á sem endurreisn bankakerfisins geta bæði fjölskyldur og fyrirtæki landsins pakkað saman og slökkt ljósið. 

Steingrímur: Okkur skiptir engu máli hvernig þið skiptið ráðherrasætunum á milli ykkar né heldur hvor ríkisstjórnarflokkanna geti talist sigurvegari flokkanna. Við erum komin með upp í kok á því að vera alltaf tapararnir! 

Jóhanna: Ef að þinn tími er kominn er þá ekki kominn tími til að nota hann?

Gylfi: Hvað varð um manninn sem flutti búsáhaldabyltingarræðu á Austurvelli?

Ef að stjórnvöld hafa skilning á vanda fólks eins og þau halda fram væri  ekki til mikils mælst með að þau sjái þá skrípamyndina sem fólki er boðið upp á með verðtryggingu ofan á okurvexti. Skrípamynd er kannski ekki rétta orðið heldur hryllingsmynd. Það er einfaldlega ekki boðlegt að lánveitendur geti lagt okurvexti ofan á verðtryggingu. En lángreiðandinn með sína 2-3% launahækkun á ári sem rýrnar núna um 10-15% um leið hefur enga verðtryggingu á sínum launum. Fyrir utan það að hafa jafnvel lækkað í launum eða misst atvinnuna.

 Ef að það er mikill ábyrgðarhluti að hvetja til örþrifaráðs eins og greiðsluverkfalls vil ég benda ykkur þingmönnum á annað. Fólk í þessarri stöðu stoppar ekki við að hætta að greiða. Það ver fjölskylduna sína og heimilið. MEÐ ÖLLUM TILTÆKUM RÁÐUM. Það eru miklar líkur á auknum verkefnum hjá sérsveit Lögreglunnar. Með lögum skal land byggja en með ólögum eyða. Ég hvet fólk til að velta setningunni í heild fyrir sér. Af hverju byggðist Ísland?

Varar við örþrifaráðum

Kjötkatlagleðin er alger........

.. þessi ríkisstjórn er þegar búin að sanna fyrir okkur að tengsl hennar við almannahagsmuni eru undir frostmarki. Það að það sé nægur tími til að japla á hverjir fái ráðherrastólana og hvernig VG bjargi andlitinu vegna ESB ástríðu Samfylkingar sýnir glögglega að þessi ríkisstjórn er ekki ríkisstjórn fólksins í landinu. Hún er ríkisstjórn flokkanna sem unnu kosningarnar. Ríkisstjórn flokka sem titra af gleði yfir því að komast að kjötkötlunum. Ríkisstjórn flokka sem telja, að því gefnu, miðað við aðstæður, útfrá þeim forsendum sem eru til staðar, og svo framvegis sjálfgefið að fólk láti sig hafa það að missa húsnæði sitt falli það ekki undir kommúnískar reglugerðarskilgreiningar um meðal Jóninn sem hefur fetað veg meðalskattgreiðandans alla sína ævi. Lausnirnar sem Jóhanna boðar eru ekki lausnir. Þetta er lenging í hengingaról og skuldbinding til eilífðarþrældóms. Það er ekki lausn. Það heitir þrælahald. Í boði ríkisstjórnarinnar. Það var aumkunarvert að hlusta á viðskiptaráðherra tala á móti greiðsluverkfalli fólks í dag. Hann talaði um að þetta kostaði bara dráttarvexti og lögfræðikostnað fyrir viðkomandi. Þarna liggur nefnilega mergur málsins. Þetta fólk sem svona talar ÆTLAR EKKI að borga þennan TILBÚNA kostnað. Það ætlar ekki lengur að spila eftir leikreglum þar sem öðrum aðilanum eru gefin öll trompin og hinum hundarnir.

Ný ríkisstjórn um næstu helgi

Þögult verðsamráð er krefjandi verk!

Forstjóri Neitt er ekki öfundsverður af kjörum sínum. Honum hefur með dómi verið gert óheimilt að fara upp í Öskjuhlíð til að hitta forstjóra hinna olíufyrirtækjanna og sammælast um verð, kjör og skiptingu um lægstu tilboð til stórkaupenda. Þess utan gert ókleyft að senda minnismiða og tölvupóst með samkeppnishamlandi leiðbeiningum. Það sér það hver heilvita maður að forstjóri sem býr við svona strangar leikreglur þarf að hugsa útfyrir kassann til að viðhalda okri án þess að upp um það komist. TD. verðleggja bensínið út úr korti í trausti þess að hinir forstjórarnir sem hann má ekki tala við skilji málið. Og fari nú ekki að andskotans til að leggja eitthvað minna á bensínið til skrílsins.

Þess utan þarf hann að safna fyrir arð- og bónusgreiðslum hluthafanna og sektinni sem Samkeppniseftirlitið skellti á fyrirtækið. Ásamt töpuðum dómsmálum vegna verðsamráðs. Bæði komnum og ókomnum fram. Sú sekt verður greidd af neytendum enda á Neitt fullt í fangi með að  halda í við eigin arðsemis- og græðgissjónarmið. Svona eins og öll önnur íslensk fyrirtæki sem hafa getað látið okkur neytendur njóta góðs af einnar krónu verðmun í þeirri bullandi fákeppni sem hér ríkir. 29.6 millur fyrir þetta eru smámunir. Hann gæti unnið hjá skilanefndum bankanna fyrir meira.

Forstjóri N1 með 29 milljónir í laun

Fjármálafyrirtækin eru að klára drápin á þjóðinni og fyrirtækjunum

Þessi frétt kemur mér ekki á óvart enda veit ég fjölmörg dæmi svipuð þessu. Varðandi bankana var í september - október staðan þannig að ef þú varst kominn í vanskil vildu þeir ekkert gera fyrir þig. Fólk í skilum átti séns á frystingu og skuldbreytingum. Ekki við hin sem gátum ekki lengur borgað. Það sama á við um fyrirtækin í landinu. Ég veit um eitt velrekið fyrirtæki sem hefur alla burði til að lifa þetta af þrátt fyrir um 50% samdrátt í sölu. Fyrirtæki sem getur ekki lengur leyst út vörur vegna þess að bankarnir lána ekki. Þeir sitja á öllu sínu fé til að geta sýnt góða eiginfjárstöðu en um leið sinna ekki hlutverki sínu. Nema gegn margföldum veðum.

Þetta fyrirtæki á eftir 4-5 daga áður en því verður lokað. Ekki af því að það geti ekki lifað af heldur út af því að eðlileg lánastarfssemi og fyrirgreiðsla er ekki lengur til staðar í landinu. Hvað sem segja má um framsóknartillöguna um leiðréttingu lána þá hafa ríkisstjórnarflokkarnir hingað til bara boðið okkur upp á lengingu í hengingarólinni, auðmýkjandi greiðsluaðlögun og óhæft bankakerfi gagnvart fjölskyldum og fyrirtækjum landsins. Því verður að breyta strax nema Steingrímur frændi vilji halda um stjórnartauma meirihluta fyrirtækja landsins og reka leigumiðlun fyrir okkur allan almenning. 

Stjórnin hefur gert á pappírunum ýmislegt til að hjálpa en í praxís er það núll. Ég hefði haldið að fyrr frysi í helvíti en ég hrósaði Framsóknarmönnum og kannski er 20% leiðrétting þeirra yfir línuna röng aðferð en þeir hugsuðu ÚTFYRIR KASSANN! Það held ég að VG komi aldrei til með að geta og miðjumoðssamsullið sem ætlar að láta Evrópu bjarga landinu ókeypis eigi líka bágt með að gera. 

Það eru komnir 6 mánuðir af engu til að reisa við bankakerfið. 6 mánuðir án skýrrar stefnu nema leynistefna IMF sé það sem ríkisstjórnin styðst við. Ef svo er eru það landráð gagnvart þjóðinni að leyna hana skilmálum IMF. 

Við fólkið í landinu viljum vita hvort það sé einhver von. Von til að halda húsinu án þess að greiða af því til 130 ára aldurs. Von til þess að bankakerfið fari að virka. Von til þess að réttlæti milli lánenda og lántakenda verði við lýði. Ingólfur H. Ingólfsson félagsfræðingur benti á það í grein í Fréttablaðinu að það væru tveir gjaldmiðlar í gangi á Íslandi. Verðtryggða krónan og sú óverðtryggða. Sú sem við fáum útborgað í. Sú sem við semjum um launahækkanir í. Oftast upp á 2-4% á ári. Núna með 17% verðbólgu. Hann bendir á að á 30 ára tímabili hefur þessi króna fallið um 3250%!!!!!!!  Ég ætla að gera þessari grein hans betur skil seinna en meðan fjármálastofnanir eru að slátra fyrirtækjum og heimilum eins og það sé sláturtíð hjá þeim þá er eitthvað að ríkisstjórn sem lætur eins og allt sé að þokast í rétta átt. Svoleiðis stjórnvöld eru jafn ónýt og aðrar „Haardandi“ rikisstjórnir.

40 vinnutækjum fátækari

Af hverju ætti ESB að vera lausn á vandamálum okkar?

Samfylkingin lætur eins og hún sé Framsóknarflokkurinn í þessum kosningum. Kemur með einn frasa, eitt mál sem töfralausn á vanda þjóðarinnar. Framsókn hafa galað Fíkniefnalaust Ísland árið 2000, milljarður í fíkniefnamálin, fólk í fyrirrúmi (sem þeir hafa notað nokkrum sinnum) osvfrv. Samfylkingin er að reyna að selja þjóðinni að innganga í ESB sé það eina sem við þurfum til að allt verði gott.

Það er heimskulegt eða í besta falli barnalegt að veifa ESB aðild að kjósendum sem einhverri lausn á vanda okkar. Í fyrsta lagi er ekkert sem bendir til þess að ESB ætli að taka á móti fleiri löndum á næstunni. Þvert á móti hafa þeir ákveðið að hægja á inngöngu áhugasamra. Í öðru lagi þurfa löndin sem sækja um aðild að sýna fram á efnahagsstöðugleika sem er ekki sjáanlegur hér á landi næstu 3-6 árin. Þetta eitt og sér gerir það að verkum að aðild að ESB er ekki inni í myndinni. 

Stjórnmálaleiðtogarnir gerðu mismikið í buxurnar í kosningarsjónvarpi Ríkissjónvarpsins í kvöld. En eiga það sameiginlegt að ólyktin af moðreyk og frasatuggunum er enn í loftinu hér. Meira að segja Ástþór Magnússon skoraði meira en flokksuppalningarnir og atvinnupólitíkusarnir. Þe. fyrst um sinn.

Krafa Borgarahreyfingarinnar um að allt verði upplýst um skilyrði IMF og gegnsæi í bankahruninu er krafa þjóðarinnar. 

Nú hef ég horft og hlustað á  flest allar kosningasamkomur sem sjónvarpsstöðvarnar hafa boðið upp á. Þar situr tvennt í hásæti hjá mér: Gjörsamlega meiningarlaus frasaframleiðsla án innihalds hjá ÖLLUM fjórflokkaframbjóðendunum. EKKERT á bak við svörin annað en að það væri hægt að túlka þau bæði sem heitt og kalt. Frjálslyndir mega eiga það að vilja virkja allt og eyðileggja náttúruna og veiða alla fiskstofnana í topp. Ekkert hálfkák og skýr skilaboð. Sem ég er ósammála en veit hvar ég hef þá. 

Vinstri grænir eru orðnir huggulega settlegir enda komnir í stjórn og svör þeirra eru jafn loðin og Sjálfstæðis- og Samfylkingarmanna. Framsókn býður svo nýja andlitsgrímu með nýju kosningaryfirboði. En sömu flokkseigendaspillingunni. A'la Alfreð Þorsteinson og Finnur Ingólfsson.

Að mínu mati liggur einhver möguleiki í því að vera á milli Bandaríkjanna og Evrópusambandsins. Einhver fríverslunar- eða tengingarmöguleiki  þar á milli. Ég hef ekkert fyrir mér í því enda hef ég ekki hugmynd um hvernig þetta virkar. En ef að Ísland gat verið ósökkvandi flugmóðurskip (sem mér finnst skelfileg hugmynd) fyrir Bandaríkin, hlýtur sú tenging að fela í sér samskonar tengingu áfram til Evrópu.

Ég hef áður lýst því hér yfir að Borgarahreyfingin fái mitt atkvæði í þessum kosningum. Það er ekki vegna þess að hreyfingin bjóði upp á töfralausnir við vanda heimilanna eða fyrirtækjanna. Það er vegna þess að þá er ég ekki að kjósa frasajaplandi róbota sem flokkseigendur þeirra ýta á on og off á.

 

 

Ekkert samkomulag um ESB