Ekkert óeðlilegt við þetta?

„Fyrrverandi stjórnarmenn fullyrða að ekkert óeðlilegt hafi verið við þessa lánafyrirgreiðslu og afgreiðsla lánanna farið fyrir lánanefnd bankans.“ „Um var að ræða lán til þessara félaga gegn veðum í skuldabréfum sem bankinn gaf sjálfur út.“

Þessum sömu mönnum fannst heldur ekkert óeðlilegt við að fá milljarða í rassvasann í aukagreiðslur og bónusa vegna velgengni og ábyrgðar þeirra. Af hverju eru þeir ekki dregnir til ábyrgðar? Blekkingaleikur þeirra er eftir sama handriti og Enron hneykslið. Þar voru menn dregnir í handjárnum út úr fyrirtækjunum. Hér stofna sömu menn og báru ábyrgð ný fyrirtæki til að ráðleggja starfsmönnum brunarústanna eða kaupa þær á útsölu.

Hvet alla til að skoða þetta viðtal við Jón Ólafsson í Silfri Egils.

 Jón Ólafsson, prófessor í heimspeki - hlustið vandlega á Jón

Og þetta: Krónan felld á almenning.

 

Hundruð milljarða millifærðir á reikninga erlendra félaga

Athugasemdir

[Árni Gunnarsson, 19.1.2009 kl. 23:31]

Ráðherrar ríkisstjórnarinnar veltu því lengi fyrir sér hvort bankarnir hefðu tekið stöðu gegn krónunni fyrir síðustu ársfjórðungsuppgjör! Og þeir hafa ásamt seðlabankastjóranum rætt um að þetta þurfi að rannsaka. Þetta mál sem er svo grafalvarlegt að mega með réttu kalla árás á fjármálakerfið og fjölskyldurnar í landinu mun aldrei verða "rannsakað" með það í huga að eigendur og bankastjorar verði látnir sæta ábyrgð.

Valda/fjáreigendakerfi okkar verður auðvitað aldrei rannsakað. Gengisfelling krónunnar var hagstjórnartæki bankanna og það var öllum almenningi ljóst. Þar þarf enga rannsókn.

Regluverkið um einkabankana var í skötulíki,- samkvæmt pöntun og það gerir öll þau siðlausu viðskipti sem fram fóru fyrir allra augum líklega lögleg þegar upp er staðið!

Nú skulum við barasta vera góðu börnin og taka utan um hvert annað, meðan Samfylkingin undirbýr aðildarumsókn í ESB.- Hennar eina viðfangsefni og erindi í pólitík á Íslandi. 

[Ævar Rafn Kjartansson, 24.1.2009 kl. 21:58]

Þessi ESB dýrkun er ofar mínum skilningi og jaðrar að mínu mati við landráð. Möguleikar okkar liggja í því að vera milli markaða. En krónan er látin svo mikið er víst.