Draumurinn um Ísland

Kæru kjósendaflón,

 

af Kögunarhóli glæstrar fortíðar flokka okkar horfum við yfir þessa fallegu hjörð af sauðfé sem lýtur til okkar til forystu í nánustu framtíð.

 

Við ykkur viljum við segja að við skorumst ekki undan því erfiða verkefni að  endurreisa gamla klíkuveldið okkar eftir að rannsóknarskýrsla Alþingis „flæktist“ tímabundið fyrir okkur.

 

Við munum Vafningslaust lækka skatta á alla landsmenn aðra en aumingjana hans Þráins og mest á vini okkar sem borguðu kosningabaráttu okkar.

 

Við munum halda í heiðri hina fornu helmingaskiptareglu okkar þar sem annar hver embættismaður með eitthvað vægi er valinn af hinum flokknum.

 

Hækjuflokkurinn í sambandinu viðurkennir þörf hins fyrir að eiga fleiri dómara á efri stigi og nauðsyn þess að sem flestirættingjar, vinir og briddsfélagar yfirmanns morgunbaðsins séu þar á launaskrá.

 

Á móti kemur að hækjuflokkurinn má ráða fyrrum kosningastjóra í alls konar fallega orðuð einskisnýt embætti sem greiðslu fyrir fórnfýsi í starfi.

 

Þó þau embætti séu vita getu- og gagnslaus skuldbindur FLokkurinn sig til að tala fallega um þessa starfssemi og láta sem hún sé gagnleg.

 

Við heitum því að yfirbjóða hvern annan í kosningaloforðum eftir því hvernig vindar blása án samráðs um ásættanlegan fórnarkostnað en leysa það með kosningaloforðasvikum eftir kosningar.

 

Við erum sammála um að þegar öllu sé á botninn hvolft skipti traust efnahagsstjórn mestu máli.

 

Millistéttaraulinn sem tók mark á okkur, hélt að þjónustufulltrúinn sinn í bankanum væri edrú og verðbólgumarkmið Seðlabankans væru ekki byggð á Norður-Kóreskri hagfræði getur sjálfum sér um kennt.

 

Efnahagsstjórn okkar var örugg og traust skv. greiningardeildum bankanna.

 

Í góðmennsku okkar ætlum við að leyfa þessum aula að taka út allan sinn lífssparnað til að borga inn á stökkbreyttu húsnæðislánahýtina án þess að skattleggja hann sérstaklega.

 

Við heitum því líka að þegar við komumst aftur til okkar réttborinna valda verður allt gott aftur.

Fyrir okkur.

 

Við heitum því að virkja allar helvítis drullusprænur sem geta snúið hverfli og selja rafmagnið undir kostnaðarverði til margdæmdra umhverfissóða og koma þannig ferköntuðum hjólum atvinnulífsins aftur á hökt.

 

Við heitum því að stoppa geðveikina við að 25 misþóknanlegir einstaklingar krukki í þá stjórnarskrá sem hefur þjónað spillingu okkar og sérhagsmunum svona dyggilega í gegnum tíðina.

 

Við heitum því að óveiddi og ófæddi fiskurinn í sjónum geti áfram verið grundvöllurinn af því að útgerðarmaður geti keypt sér pizzastað, bílaumboð og þyrlu.

 

Við skiljum fullkomlega þann hluta endurreisnar Orkuveitu Reykjavíkur þar sem kær vinur okkar Finnur Ingólfsson var fenginn til að kaupa hitaveitumæla landsmanna á 260 milljónir og fái næstu áratugina 200 milljónir í leigutekjur frá landsmönnum á hverju ári.

Þetta er nauðsynlegur partur af fjárhagslegri endurreisn landsmanna. Þe. sumra.

 

Við höfum skilning á því að fé án hirðis sé hirðulaust. Þar af leiðandi fögnum við aðkomu Íslandsvinarins Finns Ingólfssonar og annarra mætra Framsóknarmanna að því að hirða þá tugi milljarða sem Samvinnutryggingar eða Gift ætlaði á ábyrgðarlausan hátt að endurgreiða fyrrverandi tryggingartökum sínum.

 

Við viljum að Þingvellir verði áfram sérstakt útivistar- og hvíldarsvæði fyrir fyrrum foringja og útrásarpakkið okkar og Þingvallarnefnd skipuð uppþornuðum og atvinnulausum flokkshækjum.

 

Við höldum fast í þá farsælu stefnu að vanhæfni sé dyggð og munum áfram ráða td. dýralækni sem fjármálaráðherra, fallna ráðherra sem Seðlabankastjóra, vini okkar sem ráðuneytisstjóra osvfrv.

 

Fólk með rétt tengsl á ekki að líða fyrir að fólk með rétta menntun sæki um frátekin störf.

 

Við heitum því að standa vörð um bankaleyndina, yfirstéttina, fákeppnina, efnahagsóstjórnina, getuleysið og spillinguna sem hefur sett okkur Íslendinga á þann stall að geta rekið okkar eigin mynt án trúverðugleika eða viðurkenningar í alþjóðaviðskiptum.

 

Kæru bjánar,

 

við deilum kjörum ykkar og líðan í daglegu lífi og erum best fallnir til að beina Íslandi aftur á réttu brautina.

 

Með okkur við stjórnvölinn verður allt gott aftur.

 

Með vinsemd og virðingu:

 

Silfurskeiðabandalagið.

 

(Þarna vaknaði ég og fattaði að þetta var bara slæm martröð).

 

469641_545440848807271_1285483669_o

 


Nýju föt keisarans og maðkétna mjölið

Við höfum nú við völd stjórn sem saumaði skjaldborg um heimili landsins eftir hrun úr sömu efnum og nýju föt keisarans voru gerð úr.

Stjórnarandstaðan samanstendur af grasrótarhreyfingu með 3 þingmenn og hrunamönnum Íslands með tvo silfurskeiðaerfðaprinsa í forsæti. Erfingja auðæfa áralangrar flokkshyglingar sem ekki má hrófla við.

Í gær mistókst þeim að knýja fram kosningar þar sem þeir í krafti  fjármagns gætu kannski sest aftur að kjötkötlum þeim sem þeir hafa verið áskrifendur að áratugum saman.

Þeir eru ekki trúverðugir leiðtogar fyrir þjóð sem er að uppgötva að spilling, flokkshyggja, foringjadýrkun, nýfrjálshyggja til einkavina og óhæfi íslenskrar stjórnsýslu og lagabókstafa hafa svipt hana tilverunni og heimili.

Þegar danskri einokunarverslun var komið á hér ákvörðuðu dömsku kaupmennirnir einhliða bæði verð maðkétna mjölsins sem þeir seldu og verðlag fisksins og lopapeysunnar sem bóndinn og bóndakonan lögðu fram sem greiðslu.

Fram að þeim tíma höfðum við Íslendingar verið rík í krafti auðlinda okkar.

Auðlindir okkar, fiskurinn og ullin urðu undirmálsgjaldmiðill.

Maðkétna mjölið gulls ígildi.

Þetta er að endurtaka sig!

Það er verið að troða ofan í okkur af stjórnvöldum, bankastofnunum, AGS, verkalýðshreyfingarþjófunum og samtökum atvinnulífsins að klúður þeirra, vanhæfni, hugsanlega glæpsamlegar aðgerðir eins og stöðutaka gagnvart krónunni séu eins og náttúruhamfarir.

Eitthvað sem verði bara að kyngja og sætta sig við maðkétna mjölið næstu áratugi.

Þetta er ekki satt!
Frekar en að bankastofnanir hafi gert sitt „ýtrasta“ til að leysa vanda „viðskiptavina“ sinna.

Bankarnir hugsa bara um eitt: GRÓÐA!

Samfélagslegt gildi þeirra hvarf þegar Finnur Ingólfsson, Ólafur Ólafsson í Samskip, Björgúlfur Thor og faðir hans fengu þá á silfurfati frá fyrrum einræðisherra Íslands.

Hér á Íslandi geysar borgarastyrjöld ekkert síður en í Jemen, Egyptalandi eða Sýrlandi.

Fólk lætur lífið þar fyrir byssukúlum. Hér fyrir eigin hendi í örvæntingu vegna úrræða- og vonleysis.

Örvæntingu vegna þess að einu svörin frá bankanum „þeirra“ eru borgaðu eða við berum þig út.

Örvæntingu vegna þess að ríkisstjórnin sem sagðist ætla að slá skjaldborg um heimilin og sjá til þess að fólk þyrfti ekki að maula tekex í öll mál, meinti það þannig að hún sá til þess að þú ættir ekkert heimili og hefðir ekki efni á tekexi.

Og skýrði þá aðgerð „norræna velferðarstjórn“!


Við stöndum frammi fyrir 2 kostum.

1. Að leyfa áfram stjórnmálaelítu Íslands með sín 4 andlit og einn skrokk að stjórna, deila og drottna. Dæla út bittlingum og gæðum til vina og vandamanna. Láta það afskipt að þeir og styrktaraðilar þeirra sæti rannsókn.

Vera í sömu ánauð og á dögum danskrar einokunar.

Vera þrælar í eigin landi í boði 4 flokksins, Deutsche Bank, vogunarsjóða og AGS.


2. Við getum sameinast og rekið þessa óværu af okkur. Úðað skordýraeitri í öll skúmaskot. Losað okkur við jakkalakka með flokkspólitíska frasa á takteinum. Losað okkur við frasapólitík fólks sem er eins og Barbie eða Action Jack dúkkur sem hægt er að toga í spotta á og upphefst þá lesturinn........ Það er óásættanlegt að eftir efnahagshrun séu stjórnmálamenn landsins enn staddir í Morfískeppni. Það eitt sýnir hversu óhæfa stjórnmálamenn við eigum.

Icesavekosningin sýndi svo berlega að þjóðin getur klofnað í afstöðu sinni.

Gott og vel. Það heitir lýðræði.

En við getum sameinast um eitt.
Við viljum öll réttlæti og sanngirni.

Í dag stendur það ekki til boða.

Ekki með svona þingmenn.

klovn_1076988.jpg


mbl.is Vantrauststillaga felld
Tilkynna um óviðeigandi tengingu við frétt

Hvers vegna segi ég nei við Icesave samningnum?

Björgólfur Thor Björgólfsson fyrrum aðaleigandi Landsbana  Íslands (ekki prentvilla) var í fyrra í 32. sæti yfir ríkustu menn bretlands. Hann er í dag í 23ja sæti með 263.000.000.000.- króna hreina eign. 263 milljarða íslenskra króna.

Hann segist enga ábyrgð bera á bankanum eða Icesave. Frekar en faðir hans.
Eða bankastjórar bankans. Eða stjórn hans. Eða nokkur starfsmaður.

Verði Icesave samningurinn samþykktur þarf ríkissjóður að greiða strax rúma 26 milljarða í áfallna vexti af samningnum.  Fé sem hvorki er gert ráð fyrir í fjárlögum né er til heimild til að greiða út.

26 milljarðar er mikið fé. Meira en aðrir Íslendingar en útvaldir geta gert sér í hugarlund.

Það væri td. hægt fyrir það að byggja 3 varðskip í viðbót við það sem Landhelgisgæslan er með í smíðum og hefur bara efni á að leigja út eftir afhendingu. Það er hægt að kaupa 3 björgunarþyrlur í viðbót og gera eitt skip og eina þyrlu út frá hverjum landsfjórðungi.

Það væri hægt að eyða sem samsvarar 1.700.000.- í að búa til atvinnu fyrir hvern atvinnulausan mann á Íslandi. 15.000 manns.

Við gætum hætt við niðurskurðinn í heilbrigðis- og menntamálum.

Við gætum gert ótal margt.

Td. eytt þessum 26 milljörðum í dómsmálið Icesave.

Ef að Björgólfur Thor, faðir hans, bankastjórar og stjórn bera ekki ábyrgð á Icesave skil ég ekki hvernig ég, konan mín og börn gera það.

Við hvorki stofnuðum til þessarar skuldar né högnuðumst á henni.

Þess utan væri það galið af mér að skrifa upp á óútfylltan víxil af stærðargráðu sem enginn getur gefið upp. Með ófætt og óskírt barnabarn sem greiðanda.

Ég hef ekki leyfi til þess. Þú hefur það ekki heldur.

Þó að það sé mín helsta röksemd þá velti ég líka fyrir mér hvað það sé sem íslenskir, breskir og hollenskir stjórnmálamenn óttist við að fara dómstólaleiðina.

Að hagsmunir stjórnmála- og bankamanna séu svo samtvinnuð að það þoli ekki dagsbirtu?

Að kúlulánin og kunningjabuisnessinn verði opinber?

Að bankakerfið sé enn byggt á bólu sem springur á 8-10 ára fresti með þeim afleiðingum að almenningur borgar?

Vegna þess að ef þú veltir því fyrir þér þá er það raunveruleikinn sem hefur blasað við okkur áratugum saman.

Dómsmálaleiðin í Icesave kemur til með að breyta heiminum til hins betra. Hún kemur til með að upplýsa heiminn um hagkerfi sem er byggt á froðu þar sem peningar eru búnir til úr skuldum. Hagkerfi þar sem elíta landanna hagnast á þeim sem búa til verðmæti.

Dómsmálaleiðin hefur ekki bara áhrif á Íslandi, Bretlandi og í Hollandi. Hún sviptir hulunni af hagkerfi heimsins sem virkar ekki. Ekki frekar en lífeyrissjóðakerfið okkar. Þetta eru píramídasvindl og það verður ekki til siðað samfélag fyrr en við náum að drekkja siðblindni og græðgi valdshafa í Drekkingarhyl réttlætis.


Ég segi því NEI!.

nei.jpg


mbl.is Bretar og Hollendingar sagðir óttast dómstólaleiðina
Tilkynna um óviðeigandi tengingu við frétt

Sauðfé, fésauðir og vestfirsk villidýr.

Nýlega birti íslensk Arðgreiðing sláandi niðurstöður viðamikillar rannsóknar á Íslendingum.

Niðurstöður þessar kollvarpa hefðbundnum skoðunum Íslendinga á sér sem þjóð og hafa orðið til þess að svissneska fyrirtækið SpilltchundGeld hefur keypt 20% hluta í íslenskri arðgreiðingu  með það í huga að nýta sér rannsóknirnar við framleiðslu á mótefni gegn gagnrýnni hugsun.

Í stuttu máli hafa rannsóknir sýnt fram á að íslenska þjóðin  er ekki eins einsleit og fyrst var talið.

Einungis 97,8% þjóðarinnar tilheyrir flokknum sauðfé sem var áður talinn algildur flokkur. Um 2% teljast fésauðir sem er gerólíkur stofn. Hingað til hefur verið talið að um sama stofn væri að ræða en þessar rannsóknir hafa varpað ljósi á hversu gerólíkir þeir eru.

Í ofanálag hefur einnig komið í ljós að sauðféð greinist í 4 flokka.  Þannig er fyrsti flokkur líklegri til að grilla á kvöldin en hinir flokkarnir. Flokkar 2 og 3 líklegri að horfa á sápuóperur og fregnir af appelsínuhúð Kalifornískra smástirna meðan flokkur 4 tekur David Attenborough og norska framhaldsþætti inn í sitt líf. Undirflokkarnir eiga þó allir sameiginlegt að rík hjarðhegðun og sinnuleysi  eru ráðandi atferli.

Fésauðirnir, frávikið virðast hafa gerólíka og aggresívari nálgun á tilveruna. Í þeim fannst td. ekki vottur af siðferðisvitund né samvisku. Mörg þekkt dæmi eru um að  Fésauðir reyti ull af sauðfé svo undan blæði. Þeir greiða sér einnig bónus fyrir hverja blekkingu sem setur sauðfé á hausinn. Jarm þeirra er svo almennt háværara og og líklegra til að vekja athygli.
Við fyrstu athugun virðast þeir einnig eingöngu umgangast aðra Fésauði. Þe. forðast náin kynni við sauðfé nema til að mjalta það.

Annað einkenni þeirra virðist vera að bregðast við gagnrýni með því að nýta sér gjaldþrota fjölmiðla til að gera lítið úr henni. Með hugsuninni um að ef þú segir það nógu oft verði það sannleikur. Þó skipt hafi verið um kennitölu í millitíðinni.

Í þessarar könnun kom óvænt í ljós villikyn vestfirskt sem áður hafði talið verið hrakið fram af klettum og útrýmt.
0,2% viðfangsefna reyndust sem sagt tilheyra vestfirska villifénu sem reynst hafði of háfætt, hávært, styggt, og magurt fyrir íslenskt meðaltal. Þessi skekkjumarkarhópur reyndist innihalda óleyfilegt og óæskilegt magn af réttlætiskennd og sanngirni og fyrir vikið sett rannsókn íslenskra arðgreiðslna í uppnám.

Íslensk stjórnvöld hafa brugðist við í samvinnu við alþjóðagjaldeyrissjóðinn og lýst því yfir að réttlæti og sanngirni séu föðurlandssvik, ákært 9 villidýr og sett heilbrigðiseftirlitið og dómskerfið í viðbragðsstöðu.

SpilltchundGeld hefur ákveðið að setja upp höfuðstöðvar sínar á Íslandi og styðja uppbyggingu íslensks atvinnulífs.  Í því skini hefur fyrirtækið fjárfest í efstu hægri skúffu stórglæsilegs skrifborðs hjá hinu alþjóðlega endurskoðunarfyrirtæki Priceless Bullshit.

Það er þó háð þeim skilyrðum að vestfirskum frávikum verði endanlega útrýmt.
Fyrirtækið hefur einnig gefið í skyn að þau 23 störf sem það skapar fyrir útlendinga og afleidd störf í sjoppunni í nágrenninu geti verið í hættu þurfi það að borga skatta.

Heyrst hefur að ríkisstjórnin hafi fullan skilning á þessum málum og sé boðin og búin til að láta hafa sig að fífli.

tjutt2_1050644.jpg


mbl.is Telur óvíst að stjórnin lifi
Tilkynna um óviðeigandi tengingu við frétt

Norrænt helferðareinelti.

Í nýjasta Fréttatímanum, öðru tveggja blaða landsins sem ekki er ritstýrt og stjórnað af hrungerendum voru 3 viðtöl sem ég las af athygli.

Um óskyld mál fannst mér. Eitt viðtalanna var við Jón Gnarr og Einar Örn úr Besta flokknum. Annað við Malin Brand. Bannfærða af vottum Jehóva fyrir að yfirgefa söfnuðinn og ætlast til þess að barnaníðingar innan hans sæti lögreglurannsókn. Þriðja var viðtal við Njörð P. Njarðvík.

Ég las þessi viðtöl og hugsaði með mér að kannski væri Fréttatíminn alvörublað. Síðan laust eldingu í kollinn á mér! Öll viðtölin snerust um réttlæti. Skynsemi. Sanngirni. Og einelti ráðandi afla gagnvart þessu sjálfsögðu kröfum.

Malin og Jón Gnarr sæta árásum og einelti fantanna sem vilja áfram ráða og stjórna með fautaskap, grimmd og guðlegri sannfæringu um yfirburði síns og sinna.

Eineltisaflanna sem telja sig eiga landið, auðlindirnar og þjóðina.

Aflanna sem sætta sig ekki við að grínari, hugrökk kona eða sigldur mannvinur ruggi græðgisfleyinu.

Ég gaf ekki mikið fyrir fyrstu tölublöð Fréttatímans. Þessi útgáfa sýndi að blaðið er á réttri leið.

Það sýndi líka hversu helsjúku samfélagi við búum í. Þar sem hrunvaldar og pólitískir meðjarmarar halda enn um alla tauma.

Jón Gnarr og Einar Örn segjast tilbúnir til að „pönkast“ í þessu ljóta eineltiskerfi staðnaðra flokksgilda.

Hversdagshetjan Malin Brand „Tunnar“ Votta Jehóva eins síns liðs þrátt fyrir útskúfun og væntanlegar fréttir um að vera ekki heil á geði og ótrúverðug.

Þannig vinna nefnilega ráðandi öfl.

Njörður verður þeim erfiðari. Enda virtur maður. Sennilega verður því reynt að þaga hann í hel.

Þessi 3 viðtöl eiga eitt sameiginlegt. Í þeim öllum felst krafa um sanngirni og réttlæti.

Gjaldþrot, eignamissir, skuldaánauð, atvinnuleysi vegna forsendubrests eða upploginna ráðgjafar bankanna og skaðans af gerðum þeirra teldust aldrei ásættanlegt í þjóðfélagi þar sem réttlæti og sanngirni er gert hátt undir höfði.

Þessar greinar og kröfur almennings snúast bara um það.

Réttlæti og sanngirni. 

Að rétt sé gefið í þjóðfélaginu og krónan sem þú skuldar og krónan sem þú þénar sé sami gjaldmiðillinn.

Það stendur ekki til boða hjá ríkisstjórn Norrænnnar helferðar Alþjóðagjaldeyrissjóðsins. Né eigendum Íslands: Deutschebank, lífeyrissóðanna eða bankanna sem ollu hruninu.

Eineltisfantarnir á skólalóðinni eru enn við sitt.

En dropinn holar steininn.

greidsluadlogun.jpg


mbl.is Bókaskrif leiddu til uppsagnar
Tilkynna um óviðeigandi tengingu við frétt

Stríðið er byrjað!

Þeir 95 einstaklingar sem hindruðu útburðinn í dag eru byrjunin. Kannski verða þeir 200 í næstu aðgerðum. Kannski 1000. En þeim fer fjölgandi sem geta ekki lengur sætt sig við úrræðaleysi ríkisstjórnarinnar og blóðsúthellingar bankanna. Ef það á að steypa tugum þúsunda Íslendinga í glötun og skuldafangelsiþarft þú að taka afstöðu. Með réttlæti og sanngjörnu þjóðfélagi. Eða þjóðfélagi arðrána græðgi og spillingar. Það er engin hliðarlína hlut- og áhugaleysis til lengur.

 Þarna á staðnum var staddur maður með plagg frá Frjálsa fjárfestingabankanum. Hann hafði skuldað þeim 31.000.000.- Þeir vildu að hann kvittaði upp á að skulda þeim í dag 81.000.000.- Þar af 9.900.000.- í dráttarvexti og lögfræðikostnað!

frelsissvipt.jpg

Það er auðvelt að skera okkur niður eitt og eitt í sláturhúsum glæpafyrirtækja sem kalla sig banka en með samstöðu getum við flutt fjöll. Og verðtryggingin, forsendubrestur lána og græðgi bankanna eru ekki fjöll. Þetta eru steinar í götu okkar sem þarf að velta við. Ryðja af braut.

Í hvoru liðinu ert þú?

fangelsi.jpg


mbl.is Ætla að stöðva útburð
Tilkynna um óviðeigandi tengingu við frétt

Ónýta landið - ónýta liðið.

Ef eitthvað er ónýtt reynir maður ekki að gera við það. Maður hendir því!  Ef eitthvað er hugsanlega hægt að gera upp og endurbæta þannig að það þjóni sínum tilgangi vegur maður og metur kostina og gallana við að leggja í endurbætur og viðgerðir.  Hvað kostar að laga hlutinn? Hvað kostar nýr samskonar hlutur?  Ef hluturinn hefur tilfinningarlegt gildi eru meiri líkur á að hann verði gerður upp. Þrátt fyrir að ódýrara yrði að kaupa nýjan.

Við stöndum núna frammi fyrir þeim kosti að velja milli þess að gera við „hlutinn“ íslenskt samfélag eða henda honum og skapa nýjan.
„Íslenskt samfélag“ hluturinn hefur sýnt af sér að vera fúinn, feyskinn, illa gerður, einskis nýtur, illa lyktandi, aumkunarverður og gerður af flokksfólki sem hafði ekki einu sinni próf á hrífu eða skóflu. Hvað þá að það viti hvað hamar og nagli séu. Og gleymum varfærinni efnahagsstjórn, jöfnuði, heiðarleika, réttlæti og sanngirni.Í orðabókum flokkanna eru þetta bara orð til að setja á barmmerki og kosningaveggspjöld. Skraut!

Gylfi, ASÍ og þessi sjálfkjörna klíka flokkanna sem hafa stolið verkalýðshreifingunni af verkalýðnum eru partur af þessu ónýta. Óuppgeranlega. Eitthvað sem þarf að henda og búa til nýtt í staðinn.

Flokkshyggjugjammendur fyrirgreiðslu og eiginhagsmunagæslu eru enn við stjórn landsins. Flokkshyggjuglæpamenn sem létu flokkana sína og eigendur þeirra borga á sig jakkafötin. Dragtirnar. Kaupa sjónvarpsauglýsingarnar. Skipa sér í nefndir og ráð. Til þess eins að þjóna FLOKKNUM. Éti þjóðin skít!
Í dag er þetta fólk allt bit á því að það sé verið að gagnrýna störf þeirra. Eða gagnrýni á að fyrrverandi stjórnmálamaður eigi núna hitaveitumæla þjóðarinnar. Eða fá tugmilljarða afskriftir. Eða afskriftir bankanna til valinna og grimmd gagnvart almenning. Almenning sem treysti sjakölunum í bönkunum sem voru titlaðir „ráðgjafar“.
Allar þeirra gerðir byggjast á því að senda frá sér loðnar yfirlýsingar um skjaldborg um heimilin sem við nánari skoðun breytist ávallt í gjaldborg fjármagnsins. Leikritið heldur áfram og snýst eingöngu um að kasta ryki í augu þjóðarinnar.

Meðan Jón og Gunna eru borin út. Og úps.... það er ekki hægt að bjarga öllum er viðkvæðið.

Við þurfum að meta hvort Ísland gærdagsins hafi eitthvað tilfinningarlegt gildi fyrir okkur. Ætlum við að hengja okkur í víkingaarfleifð? Sérstöðu? Söguna? Er hún beysin? Hörku okkar sem víkinga?  

Taka þátt í þeim blekkingarleikjum sem ríkisstjórn, flokkarnir og glæpaberserkir þjóðarinnar spinna nú?

Nei. Við þurfum að taka málin í okkar hendur.

Við megum ekki unna okkur hvíldar fyrr en eftirfarandi hefur gerst:

4 Flokkurinn hefur verið bannaður til næstu 20 ára.

Öllum embættismönnum sérstaklega þó í áhrifastöðum og tengdir flokkum eða áhrifafólki hefur verið sagt upp og erlent ráðningarfyrirtæki fengið til að endurráða í þær.

Rannsóknarnefnd hefur verið skipuð um einkavæðingu ríkisfyrirtækja.

Ráðningar í embætti, sérstaklega dómara verði rannsakaðar af hlutlausum aðilum.

Stjórnmálamönnum verði bannað að sækja um opinber embætti.

Sjálfsagt mætti bæta við þennan lista en þetta er byrjun á uppgjöri. Hættum að sætta okkur við að vera með getulausa blýantsnagara í áhrifastöðum. Hættum að sætta okkur við kúgun flokkanna. Hættum að láta flokksfyrirtæki hagsmunahópa stjórna landinu. Fáum fólk til þess. Við erum þjóðin. Ekki flokksplebbarnir.

Bandarískur forstjóri stórfyrirtækis sagði einhvern tímann að hann gæti stjórnað Íslandi í kaffitíma sínum. Spurning hvort einhver hafi símanúmerið hans?

hlekkir.jpg


mbl.is ASÍ krefst stöðugleika
Tilkynna um óviðeigandi tengingu við frétt

Hvenær finnst ÞÉR nóg komið?

Þegar tilveran hrynur undan fjölskyldu og við blasir óbrúanlegt hyldýpi með, 50 - 70% heimilisteknanna horfinna er ekki furða að sumir leggi árar í bát. Gefist upp. Stoltir iðnaðarmenn sem hafa séð fjölskyldum sínum farborða eru allt í einu ekki matvinnungar. Komnir upp á tekjur konu sinnar. Eða jafnvel bæði atvinnulaus. Og endar ná ekki saman.
Þrátt fyrir að afkvæmin fái ekki lengur að stunda íþróttir eða tónlistarnám. Þrátt fyrir að öðrum heimilisbílnum hafi verið lagt. Þrátt fyrir frystingu heimilislánanna. Framundan er það eitt að geta ekki veitt fjölskyldu sinni húsaskjól í neinni mynd. Engin von um að geta samið um eða greitt húsnæðislánin sín sem fóru frá því sem ráðgjafinn í bankannum hafði reiknað út í að vera tvö- eða þrefföld sú upphæð.

Ráðgjafinn og bankinn eru stikkfrí. Ekki sá sem fór að ráðum þeirra. Hans er ábyrgðin, sektin og gjaldið. Um alla ævi. Þetta er íslenski raunveruleikinn sem boðið er upp á af bönkum og stjórnvöldum.
Mistök þeirra eins og allra harðstjóra liggur í einu. Vanmatinu á þanþolinu og réttlætiskennd fólks.
Þanþol Íslendinga er ótrúlegt. Íslendingar vilja bara lifa sínu lífi, kjósa milli mismunandi hagsmunaþumbaflokka af illri nauðsyn, takast á við skakkaáföll sem þeir vita að verði og reyna að gera það besta úr lífinu.

Þar til kemur að því að það er sparkað of oft í þá. Búsáhaldabyltingin kom í kjölfar þess.
Með kröfunni um leiðréttingu og réttlæti.

Það bólar á hvorugu þrátt fyrir ríkisstjórn sem telur sig til vinstri. Það bólar ekki á skjaldborginni eða norrænu velferðarstjórninni sem þessi ríkisstjórn boðaði.

Þessi ríkisstjórn veður í villu og svíma með að af því að hún markaðssetji sig sem velferðar- og vinstristjórn hafi hún frekari leyfi til að selja land og þjóð undir Alþjóðagjaldeyrissjóðinn.

Þessi ríkisstjórn óð einnig reyk um efnahagsmál og velferð þjóðarinnar þar til að átta þúsund Íslendingar vöktu hana upp af værum blundi með tunnutrumbuslætti.

Þessi ríkisstjórn sýndi að svonefnd gjá milli þings og þjóðar er ekki til staðar. Það er svarthol þar á milli.

Óttaslegin boðar hún snuð. Það þurfti að kveikja bál, eyðileggja ráðherrabíla, framkalla áður óþekktan hávaða á Austurvelli, brjóta rúður í Alþingishúsinu og mála það til að þau rumskuðu. Tveimur árum frá hruni. Og snuðið felst í því að hún ætlar að tala meira við hagsmunaaðila. Tala meira við stjórnarandstöðuflokkana sem ollu hruninu. Leyfa þeim að gera sig breiðari án raunverulegra úrræða.
Bjóða þjóðinni upp á meiri ræðumennskuskylmingar þrautþjálfaðra Morfísstjórnmálaplebba.
Hún ætlar að leita allra leiða. Gera sitt besta. Setja vandamál heimilanna í forgang. Una sér ekki hvíldar fyrr en lausn fæst. Leggja þunga áherslu á. Ná breiðri samfélagslegri sátt. Gera stöðugleikasáttmála. Snúa hjólum atvinnulífsins. Örva nýsköpun. Blablablablabla......

En.......
Við megum ekki gleyma því að hér ríkir kreppa og erfitt um vik. Og í kjölfarið verða enn settir plástrar á opin beinbrot.

Í dag flytur ein fjölskylda af landi brott hvern dag. Þeim á eftir að fjölga. Mín er þar á meðal og nokkrar aðrar innan ættarinnar. Hjá sumum okkar snýst þetta um atvinnuleysi en ekki allra.

En við eigum það öll sameiginlegt að hafa misst trúna á íslenskt stjórnkerfi, íslenska stjórnmálaflokka, íslenskt réttlæti og íslenskt efnahagslíf sem er enn í höndum þessara fáu manna sem komu okkur í
þessa stöðu.
Þeir greiða sér 400 milljóna króna arð í hruninu, fá afskrifaða 54.7 milljarða af 8 fyrirtækjum sem vegna bankaleyndar má ekki upplýsa um, viðhafa enn einnar króna verðfákeppni, styrkja réttu
stjórnmálaflokkana, ganga enn lausir og græða á hörmungum okkar.

Starfsmenn skilanefnda bankanna afskrifa og breyta skuldum réttra aðila og ná því til baka á nokkrum venjulegum sauðum. Um þetta eru til mörg dæmi.

Þetta þjóðfélag er ónýtt. Stjórnmálaflokkarnir, hagkerfið, ræfils verkalýðsforystan sem samanstendur núna bara af Lífeyrissjóðarónum með timburmenn eftir útrásarrónana félaga þeirra, gegnsýrt embættismannakerfi af blýantsnögurum sem fengu jobbið fyrir það eitt að mæta á flokksfundi hjá Framsókn og Illfyglinu. Og núna síðast Samspillingunni.

Þetta er þjóðfélag þar sem 30 millur í kosningarsjóð er pís of cake. Engin ástæða til að ætla að greiðinn verði rukkaður. Þetta er þjóðfélag þar sem þingmenn stíga af þingi meðan stormurinn gengur
yfir. Þetta er þjóðfélag þar sem ríkið og Reykjavíkurborg styðja fjölskylduhjálp um sitt hvorar 2 milljónirnar á ári. En borgin fær 1.1 milljón til baka í húsaleigu. Fjölskylduhjálpin þarf í dag tæpar 3
milljónir á mánuði til að aðstoða fólk. Fólk sem kemur þangað hefur jafnvel ekki borðað dögum saman. Er þetta ásættanlegt?
Eigum við að leita allra leiða? Reyna að fremsta megni? Skipa nefnd til að fara ofan í brýnustu þarfir?

Það er komið nóg af pólitík. Það er komið nóg af orðskrúði. Það er komið nóg af hagfræðingatali. Það er komið nóg!

Notum KISS á þetta. (Keep it simple stupid). Við erum með óhæfa stjórnmálamenn og árangur okkar yrði betri með að velja af handahófi úr símaskrá. Við erum með siðblinda eigendur meirihluta stærstu fyrirtækja landsins. Við erum með fólk gangandi laust sem hefur valdið meira tjóni en Bernie Maddoff sem afplánar 150 ára fangelsi í Bandaríkjunum. Við erum með fólk sem ber ábyrgð á 3 af 10 stærstu
gjaldþrotum sögunnar í heiminum semjandi um afskriftir lána sinna.

Á sama tíma er 68 ára gömul kona borin út. Af því að hún treysti orðum manns sem vann hjá einum þessara siðblindingja.

Í mínum huga er komið meira en nóg.

bolur3.jpg


mbl.is Skuldavandi heimilanna ræddur
Tilkynna um óviðeigandi tengingu við frétt

Steingrímur fjármálastjóri í sláturhúsi frjálshyggjunnar.

Þaulþingseta fyrir hvern?
Tveir æðstu stjórnendur ríkisstjórnar eiga samanlagt að baki um 60 ára þingsetu. Nánar tiltekið 59 ár. Engu að síður eru þau núna í valdamestu embættum sem þau hafa gengt. Og valdalaus í þeim ef marka má Lilju Mósesdóttir. Strengjabrúður Alþjóðagjaldeyrissjóðsins sem hafnar lyklafrumvarpi hennar. Kallar aðstoðarmann dómsmálaráðherra á teppið fyrir að reyna úrbætur fyrir skuldara.

Það hlýtur að vera aumt fyrir þessa ráðherra að enda pólitíska ævi sína þannig að verða minnst í sögunni sem fótgönguliða björgunarsveitar alþjóðagræðgisvæðingarinnar. Starfa í sláturhúsi frjálshyggjunnar, blóðugur upp fyrir haus í aftökum heimila og fyrirtækja.
Hafa stokkið á tækifærið til að baða sig í sviðsljósi rauða dregilsins sem bjargvættur en lúta í lægra haldi fyrir alþjóðlegri bankastarfssemi og enda sem slátrari á færibandi Deutsche bank og skyldra fyrirtækja.

Öll markaðssetning um annað breytir ekki dóm sögunnar. Enginn Einar Karl getur skrifað þau út úr þessu hlutverki. Persónur í sápuóperum geta lifnað við í miðju sturtuatriði, breyst í skúrk eða hetju, sigrast á banvænum sjúkdómum og orðið tvíburi sinn. Það á hvorki fyrir Jóhönnu né Steingrími að liggja. Frekar en meðreiðarsveinum og fraukum.

Erlendar bankastofnanir notuðu aðferðir fíkniefnasalans við að gera örríkið Ísland háð dópinu sínu. Dældu inn dópi í formi ódýrs fjármagns sem ósvífnir fjárglæframenn ánetjuðust auðveldlega. Og náðu að gera þá eins háða og aðra fíkniefnaneytendur. Þeir fóru að stela. Ljúga upp verðmæti eigna sinna til að geta fengið lánað fyrir næsta skammti. Lugu að foreldrum sínum og öðru gömlu fólki að sparifé þess væri best fólgið hjá sér. Gerðu varðhunda lífeyrissjóðanna að svallfélögum sínum. Eins og með aðra fíkla var ekkert heilagt. Ekkert framar því að tryggja sér næsta skammt.

Þessir fíklar gerðu stjórnvöld meðvirk. Embættiskerfið. Það þorði enginn að mótmæla fíklinum enda ákveður hann verðlagningu alls sem er til sölu á landinu í dag. „Hann á etta - hann má etta“.
Þeir sem mótmæla, leita sanngirnis og réttlætis geta gleymt því að lifa og starfa í norðanverðri Evrópu. Í ofanálag virðist pólitísk framtíð heilu stjórnmálaflokkanna háð hans skaplundargeði.

Í þessu umhverfi sitja jarðfræðingur og flugfreyja í æðstu embættum ríkisstjórnar. Bæði með um og yfir 30 ára reynslu af klækjapólitík, hrossakaupum, katta- og kosningasmölun, slægð, pólitískri markaðssetningu, flokkseigendahollustu.

Bæði sannfærð um að þau séu að gera það besta í stöðunni. Svona eins og Ingibjörg Sólrún og Geir Haarde voru og eru.

Þau tvö og gullskeiðarkálfar Framsóknar og Sjálfstæðisflokks hafa misboðið þjóðinni núna í 2 ár með sandkassaati sem verður ekki liðið lengur. Hefði aldrei átt að líðast.

Jóhanna og þið hin. Ykkar tími er liðinn. Hann leið þegar þið fóruð í hanaslag um Icesave og ESB meðan við vildum bara björgunarhring. Okkur getur nefnilega greint á um þá hluti en stærsti hluti þjóðarinnar er sammála um það að hér eigi að ríkja sanngirni og réttlæti. Eðlilegir viðskiptahættir miðað við þær þjóðir sem við berum okkur saman við.
Við eigum ekki að þurfa að lesa um að við séum á sama stað og Simbabwe í neinu tilfelli. Eða að viðskiptasiðferði hér sé líkt því sem Nígería státar af. Samt er þetta staðreynd í dag.

Þið hafið komið fram í fjölmiðlum og sagt að nóg sé að gert fyrir heimilin. Á sama tíma að úrræði ykkar dugi kannski 5.000 heimilum af 23.000 sem þurfa alvarlega aðstoð.  Þið bjóðið fólki sem ræður ekki við 110.000 afborganir lausnir eins og það að leigja fyrrverandi heimili á 330.000 krónur. Þið segið að heimilin þurfi ekki að lifa á tekexi í öll mál. Þið segið að lengri opnunartími sýslumanna sé úrræði.

Jóhanna, hafi þinn tími einhvern tímann komið var það á öld örbrigðarinnar þegar ungbörn fengu kúamjólk og fiskistöppu í fæði. Ungbarnadauði var þá 70%. Þér finnst kannski 70% gjaldþrot ásættanlegt?

Stigið til hliðar. Viðurkennið vanmátt ykkar. Það þarf fólk með sterk bein og sterka réttlætiskennd til að taka til. Skrúbba öll illa lyktandi hornin eftir áratuga spillingu og einkavinavæðingu. Skafa upp skítablettina. Spillingarsveppagróin. Það þarf fólk sem er ferskt. Ekki rótgróið í ég klóra þér og þú mér pólitíkina sem þið eruð  partur af.
Segið af ykkur og biðjið liðið sem tekur við um að falla ekki í sömu gryfju og þið. Gryfju flokksins.

Ísland þarf stjórnmálamenn eins og Lilju Mósesdóttir. Þingmenn Hreyfingarinnar. Innan Framsóknar eru meira að segja þannig þingmenn. Við þurfum ekki Pétur Blöndal, Árna „Hellu“ Johnssen, krónprinsa, klækjarefi eða fyrrverandi fréttamenn á þing.

Ísland þarf heiðarlegt uppgjör við fortíðina. Uppgjör laust við flokkslínur, meirihluta og ítök í fjölmiðlum. Við þurfum uppgjör án þess að raka hárið af hórunum og tjarga þær. Án þess að taka „ætlaða“ föðurlandssvikara af lífi. Það er fáránlegt að Geir H. Haarde skuli einn sæta niðurstöðu Landsdóms. Davíð Oddsson, Finnur Ingólfsson, Valgerður Sverrisdóttir og Halldór Ásgrímsson glotta framan í þjóðina og bera öll margfalda sök Geirs.

Meðan þessi vinnubrögð tíðkast og ríkisvaldið kemst upp með eru engar líkur á því að við förum að horfa fram á veginn.

Reiðin sem kraumar í samfélaginu er eins og spár jarðfræðinga. Þeir gefa næsta gosi nokkrar vikur. Hugsanlega er styttra í gos íslensku meðvirku, langlundargeðsþjóðarinnar.

Og það verður ekki búsáhaldabyltingargos.

bolur6.jpg


mbl.is Óánægja vegna skuldavanda
Tilkynna um óviðeigandi tengingu við frétt

Gleymdirðu að segja: Nei djók, Steingrímur

Kæri Steingrímur!
Í grein þinni í Fréttablaði Jóns Ásgeirs 21. ágúst sl. undir fyrirsögninni „Land tekur að rísa“ ferð þú yfir ráðstafanir ríkisstjórnarinnar, hrunið og framtíðina.

Verandi formaður þess eina fjórflokkaþursins sem sátu ekki við kjötkatla hrunmeistaranna mærir þú árangur ríkisstjórnar ykkar: Nýtt tekjuskattskerfi. Ein hjúskaparlög. Bann við kaupum á vændi. Metnaðarfulla stefnu í loftslagsmálum. Óþarfa Varnarmálastofnun lögð niður.

Hvað er að þér? Þingið var að þrasa um bjór- og léttvínssölu í matvöruverslunum meðan landið lagðist á hliðina! Eydduð svo ári í enn óafgreitt mál þar sem þingið er að velta fyrir sér samningi um HVERNIG þjóðin á að borga ICESAVE.  Til að teljast aðili að samning þarf maður að hafa haft hag af honum OG tekið þátt í gerð hans. Ég veit ekki til þess að íslenska þjóðin hafi komið þar nálægt.

Þú talar um gagnsæi og trúverðugleika. Þar fáið þið sömu falleinkunn og hrunflokkarnir. Már seðlabankastjóri var orðinn handhafi embættisins löngu áður en það var auglýst. Einar Karl er búinn að vera riddari, hrókur, biskup og drottning í einu og sama taflinu. Evu Joly réðuð þið vegna utanaðkomandi þrýstings.  Eins á við um fleiri mál. Það er ekki nóg að þessi ríkisstjórn setji reglur um hlutina og fylli svo öll skörð með meðreiðarsveinum í krafti „tímabundinna“ ráðninga. Það gerir ykkur ekkert betri en „hin“!

Af hverju hefur ekkert meira verið gert með rannsóknarskýrsluna. Er hún kannski bara að „þvælast tímabundið fyrir ykkur“ eins og nýkjörinn varaformaður Sjálfstæðisflokksins orðaði það gagnvart sínum flokk? Á skýrslan og áfellisdómar hennar að safna ryki gleymskunnar? Er kannski enn óþarfi að persónugera hlutina?

Þú talar um afnám eftirlaunaréttinda ráðherra og alþingismanna og faglegar ráðningar dómara. Og opinberar að vildarvinaráðningarnar hafi verið á ykkar vitorði en þið ekkert gert með það. Annað en að mótmæla pínusmá. Þið áttuð að ganga af þingi ef þið meintuð það. En kannski hafið þið hugsað sem svo að það kæmi að ykkar fólki.....

Þið hafið náð að gera kröfur kjósenda um almennilegt lýðræði og sanngjarna stjórnarskrá að markaðssetningarkapphlaupi hagsmunahópa og með því að Alþingi sem hefur aldrei notið minna trausts almennings, hafi svo úrslitavald um niðurstöður stjórnlagaþings, gert þessa hugmynd að tíma- og fjármunaeyðslu.

Þú telur upp í grein þinni fjölmörg úrræði til hjálpar heimilum landsins. Jóhanna nefndi á einum tímapunkti  yfir 50 atriði til hjálpar heimilunum. Er lengri opnunartími skrifstofa sýslumanna hjálp fyrir heimilin? Félagsmálaráðherra sagðist ætla að sjá til þess að fjölskyldur landsins þyrftu ekki að maula tekex í öll mál.  Tekex er lúxusvarningur hjá tugþúsundum Íslendinga í dag en þetta sýnir vel veruleikatengingu ríkisstjórnarinnar við raunveruleika umboðsveitenda hennar.

Öll úrræði ykkar snúast um ákvarðanatöku utanaðkomandi um lausnir. Ekki hvað heimilin geta. Skilanefndarmenn í bönkunum afskrifa og breyta lánum þeirra sem næst sér standa án eftirlits. Á kostnað hverra?  Ef lyklafrumvarp Lilju Mósesdóttur hefði náð fram að ganga hefðu heimili landsins getað samið. Það vill nefnilega enginn missa heimili sitt. Því reyna allir að þenja sig til hins ýtrasta til að svo verði ekki. En leikreglurnar sem þið samþykktuð eru þannig að fólk sem skuldar núna (ma. vegna hækkana ykkar á víni, tóbaki og bensíni) 35 milljónir í 25 milljón króna eign missir hana á uppboð þar sem bankinn kaupir hana á 5 milljónir, skráir í eignasafn sitt 30 milljón króna skuld og 25 milljón króna eign. Fyrir vikið er fáránlegt fyrir bankann að vilja eitthvað semja við þig.
Svo er það með þessar hækkanir á bensíni, víni og tóbaki. Þið vissuð allan tímann að þetta myndi ekki skila ykkur meiri tekjum ekki satt? Að smygl og brugg myndi aukast? En þetta hækkar húsnæðislánin okkar og kannski eru kröfuhafar bankanna fúsari til að kaupa af þér bankana?  Vertu maður og viðurkenndu það. Ekki er heimskunni fyrir að fara þannig að ég sé ekki aðra skýringu.

Þú talar um örvun atvinnulífsins.
Á sama tíma og fólksflótti hefur ekki verið meiri síðan um 1880 hælir þú þér af aðgerðum til örvunar efnahagslífsins. Þið ljúgið um atvinnuleysið með því að neita 4000 manns um atvinnuleysisbætur vegna breyttra reglna. Kannski voru einhverjir þar í vinnu. Kannski voru einhverjir sem sættu sig ekki við að vera arkitekt á kassa hjá útrásarróna. Það skiptir engu máli.
Þessi þjóð er sundurtætt, ráðvillt, reið og treystir engum. Réttilega.
Ef að ykkar lausnir og aðgerðir eru það besta sem býðst hér er á hreinu að besti kostur okkar allra er að hífa upp segl og sigla til baka. Fyrir tveimur árum síðan hefði aldrei hvarflað að mér að flytja af landi brott. Nú er ég samt að undirbúa það og nokkuð spenntur. Var það ekki annars lausn Alþjóðagjaldeyrissjóðsins á atvinnuleysinu? Hrekja fólk í burt?  Þú og Jóhanna, fulltrúar þess sem þið kallið „norræna velferðarstjórn“ skrifuðu undir samkomulag við Alþjóðagjaldeyrissjóðinn um að nauðungarsölurnar skyllu á með fullum þunga í október! Þið voruð búin að telja hversu mörg heimili þyrftu alvarlega aðstoð. 23.0000 heimili. Þið ákváðuð að aðstoða 5.000 þeirra.  Hin eru þá væntanlega „ásættanlegur fórnarkostnaður kreppunnar“!

Steingrímur! Sýndu hinum Norðurlöndunum þá virðingu að hætta að tala um „norræna velferðarstjórn“ og sýnið þið Jóhanna kjósendum ykkar þá virðingu að tala ekki um „Skjaldborg“! Gjaldborg væri nær lagi.

Það er vissulega rétt hjá þér Steingrímur að það er að rofa til. Ég er td. kominn aftur með atvinnu sem er meira en margir geta sagt. Ég gæti meira að segja samið við bankann minn um eilífa skuldaánauð og haldið áfram að búa hér.  Þreyja þorrann eins og svo oft áður. Notað „þetta reddast“ á ástandið. Og tekið á því. En það hefur eitt breyst. Hér á landi koma kreppur á ca. 10 ára fresti. Kannski er þessi sú versta en það er ekki endilega aðalmálið.

Þetta hrun hefur upplýst að innviðir stjórnmála- og embættismannakerfis Íslands eru rotnir inn í kjarna. Nýtt Ísland í kjölfar hrunsins er útópía okkar bláeygu borgaranna sem héldu að hægt væri að breyta. Að höndum yrði tekið saman, dekkið smúlað, spilin stokkuð og gefið upp á nýtt. Án þess að svindla. En það stendur ekki til boða.

Hér eiga enn þeir menn sem ryksuguðu upp fé bankanna, blekktu upp verðmæti eigin fyrirtækja, hreinsuðu upp sparifé fólks, stunduðu fákeppni og þegjandi einnar krónu samkeppni nánast öll fyrirtæki landsins sem eru nauðsynleg fólki til daglegs lífs. Og hafa fengið á silfurfati skilanefnda með tugmilljarðakróna afskriftum,  þau sem farið hafa í þrot.

Hér eru getulausir flokksgæðingar ráðnir í embætti. Börn þeirra eiga aðgang að blýantsnagandi hátekjustörfum  án getu til annars en að mæta og vera með.  Það hefur ekkert breyst innan stjórnsýslunnar annað en það að nýjir flokkar geta raðað á ríkisjötuna.

Samkeppnisstofnun, neytendastofa, fjármálaeftirlit og allar þær stofnanir sem áttu að sjá um hagsmuni almennings eru enn bara geymslustofnanir fyrir flokkaspírur.  Bitlaus, atkvæðalaus, ráðalaus, metnaðarlaus og getulaus möpputígrisdýraembætti.
 Ekki misbjóða mér og öðrum Íslendingum með því að hér sé „Land tekið að rísa“.  Meðan spillingin það sem hrægammar hrunsins keppast við að auðgast á eymd fólks ríkir.  Þinn flokkur og hinir 3 skaffa sér milljarð af skattfé landsmanna á kjörtímabilinu, rannsóknarskýrslan fær ekki framhaldsmeðferð, draumur þjóðarinnar um stjórnarskrá sem er ekki afrit af dönsku útgáfunni er drepinn, Seðlabankinn geti logið um verðbólguspár og bankar þurfa ekki að ábyrgjast „ráðgjöf“ sína. Hreinlega sagt meðan réttlæti ríkir ekki hér á landi, slepptu þessari setningu!

Ertu til í að segja hana augliti til auglits við þær þúsundir Íslendinga sem eru að missa heimili sín?
Biðröðina hjá mæðrastyrksnefnd og fjölskylduhjálpinni?
Þessar 4000 manneskjur sem þið strokuðuð út af atvinnuleysisbótum?
Fólkið sem horfir á eftir ástvinum vegna sjálfsvígs í kjölfar kreppunnar?
Fólkið sem á ekki fyrir skólabókum fyrir börnin sín?
Sl. daga hef ég vegna vinnu minnar orðið vitni að gömlu fólki gramsandi í ruslatunnum eftir dósum til að selja. Betlandi fólki. Fólki borgandi bensín á bíulinn með tíköllum og krónum. Fólki gangandi tómhent út úr matvöruverslunum af því að innistæða var ekki á kortinu. Dæmir þú þetta fólk eins og Pétur Blöndal myndi líklega gera sem óráðsíufólk?

Þið stjórnmálamenn hafið sagt við okkur kjósendur að þið sækjist eftir þingsæti til að vera vörslumenn hagsmuna okkar. En hafið sýnt að vera vörslumenn hagsmuna flokksins.

Verðtrygging lána og útreikningar standast enga skoðun miðað við sanngirnissjónarmið. Við afnám verðtryggingar launa urðu til tveir gjaldmiðlar í landinu. Verðtryggða króna lánveitendans og óverðtryggða króna laun/lánþegans.  Þessi gjörningur einn og sér er gróft mannréttindabrot þó í meðförum ríkisstjórna, verkalýðsfélagseigenda og atvinnurekenda hafi verið markaðsssett sem „þjóðarsátt“.
Horfðu á þessa „sátt“ núna og afleiðingar hennar! Hvar er ábyrgð Seðlabankans á fölskum verðbólguspám og bitlausum efnahagsaðgerðum?. Hvar er ábyrgð stjórnvalda á þensluhvetjandi aðgerðum eins og Kárahnjúkavirkjun, stærsta drullupolli Evrópu? 90% húsnæðislánakosningartrikki Framsóknar sem Geir H. Haarde ákvað vera ásættanlegan fórnarkostnað fyrir áframhaldandi valdastólaverming?
Er ábyrgðin alltaf skattborgarans? Af því að eiga óhæfa stjórnmálamenn? Núna er Orkuveitan að bætast við með jafnvel 20% hækkun til að dekka sitt sukk. Hækkanir sem verða til þess að fólk sem skiptir ekki einu sinni við fyrirtækið, skuldar meira i húsnæði sínu! Þið skattleggið fólk sem hefur ekki efni á að láta skoða ökutækin sín. Þið verðlaunið þá sem hafa efni a að láta laga húsnæði sitt á kostnað þeirra sem hafa ekki efni á því. Þið ætlið að kreista 10 milljarða í viðbót á næsta ári út úr skattborgurum sem eiga varla til hnífs og skeiðar!

Setningin með lögum skal land byggja en ólögum eyða er enn í fullum gangi. Og það bólar ekkert á því að ólögin víki. Þar berð þú og þinn flokkur jafna sök með hrunflokkunum þremur.

ps.
Segðu Jóhönnu að slökkva ljósin á Keflavíkurflugvelli þegar þið farið héðan líka. HS orka tekur nefnilega strangt á vanskilum.
mbl.is 39 fyrirtæki gjaldþrota í júlí
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband