Hvaða fólk Jón?

Kæri Jón,
Ekki veit ég eða er dómbær á hvort sé um að kenna heimsku minni eða glákueinkennum en það vefjast fáein atriði óskaplega fyrir mér í sambandi við áherslumál ykkar og stjórnarsetu. Vil ég því biðja þig fróðastan manna um raunverulegan ásetning Framsóknarflokksins að fræða mig á þeim atriðum sem ég hef áhuga á að reyna að skilja betur.

Sl. ár hef ég fylgst með störfum þessarar ríkisstjórnar sem þú og þitt fólk hafið mannað á myndarlegan hátt. Það myndarlegan að flestir félagsmenn ykkar hafa á síðastliðnum árum náð ráðherratign og viðeigandi eftirlaunum sem er mjög gott fyrir ykkur.
Kosningarbarátta ykkar hefur verið frekar töff miðað við sveitavargsstimpilinn sem hefur lengi loðað við flokkinn og þannig lifa enn í dag slagorð sem þið hélduð mikið á lofti eins og “Milljarður í fíkniefnamál" og “Fólk í fyrirrúmi" .

Ég veit að þið getið flaggað bæði tölum og súluritum um það að þessi milljarður hafi skilað sér í fíkniefnamálin en hvernig stendur þá á því að Fíkniefnadeild Lögreglunnar má ekki vinna yfirvinnu við rannsókn mála án þess að slegið sé á puttana á þeim. Eru þeir svona óþekkir?

Ég veit það að það var ekki þinn flokkur sem skar heilbrigðiskerfið á háls. Alþýðuflokkur Íslands með Sighvat Björgvinsson sem heilbrigðisráðherra tók það verk að sér sem hækja Sjálfstæðisflokksins. En þið tókuð við hræinu og hafið gætt þess vandlega að því haldi áfram að blæða.

Eða þýðir það “Fólk í fyrirrúmi" að heilbrigðiskerfið sé þannig uppbyggt að það er bara fyrir fullhraus fólk að leggjast inn á spítala af því að það er enginn til að annast um það og ef einhver starfsmaður er á deildinni skilur hann ekki stakt orð í íslensku

Þýðir það “Fólk í fyrirrúmi" að heilbrigðiskerfið sé þannig uppbyggt að það sé bið í nánast allar aðgerðir nema ef einhver dúkka vill fá gúmmí í geirvörturnar?

Þýðir það “Fólk í fyrirrúmi" þegar sjúklingar hringja eftir aðstoð sé sagt við þá: Ég skal láta þinn sjúkraliða vita að þú sért að hringja, þú ert ekki minn sjúklingur og viðkomandi bíður síðan tímunum saman eftir aðstoð.

Landsvirkjun bjó til frasa sem hljómar einhvernveginn svona: “Það er ásættanlegt að ráðast í Kárahnjúksvirkjun" miðað við arðsemi. Það getur vel verið að ég fari ekki rétt með frasann ég hef bara heyrt hann 10 sinnum en hvað voru þeir hjá Landsvirkjun að segja? Var það ásættanlegt að eyða þessu stóra landssvæði og griðlandi hreindýra og gæsa fyrir eitthvað sem verður orðið að risastórum drullupoll eftir 100 ár?

Ég veit að hvorki ég né þú verðum á lífi þá en eiga stjórnmálamenn bara að hugsa nokkur ár fram í tímann?

Þýðir það “Fólk í fyrirrúmi" að setja niður ómanneskjulegar stóriðjur alls staðar á landsbyggðinni. Er þetta kannski landsbyggðarstefna flokksins í heild sinni?
Eða snýst málið kannski um það að Halldór Ásgrímsson var búinn að lofa kjósendum sínum álveri sama hvað raular og tautar og náttúruperlur eða framtíðarsjónarmið mega sín einskis gagnvart þessu loforði hans.
Að austfirðingar hafi fengið álver af því að Halldór sagði það?

Getur verið að þið séuð að tryggja ykkur atkvæði með því að eyðileggja Ísland framtíðarinnar þegar óbyggð náttúra verður orðin að verðmætum?

Vinna Íslendingar láglaunastörf á Íslandi?
Getur verið að þú gleymir því að heilbrigðiskerfið okkar og fiskvinnsla er í dag aðallega mönnuð austurevrópsku- og asísku fólki?
Harðduglegu fólki og vel liðnu en fólki sem er hér vegna þess að Íslendingar fást ekki í þessi störf vegna launa ma.

Er “Fólk í fyrirrúmi" í verksmiðjum? Það vantar enn 100 starfsmenn í Reyðarál þrátt fyrir tugi heilsíðuauglýsinga. Verður ekki lokaniðurstaðan að þeir koma erlendis frá?

Þýðir það “Fólk í fyrirrúmi" að æpa alltaf “Álver- Álver" í hvert einasta sinn sem landsbyggðin á í vanda.

Þetta er helmingi harðgerðara og heilbrigðara fólk en reykvíska verðbréfakynslóðin og hefur gert heilmikið til að aðlaga sig að breyttum aðstæðum. Það breytir samt ekki því að meðan menntunar og starfsmöguleikar yngri kynslóða byggja allar á störfum á höfuðborgarsvæðinu breytir eitt eða tuttugu álver engu um fólksflótta. Ekki frekar en ef hreindýrin fyrir austan færðu sig á Suðurlandið.

Vilt þú Jón að fólkið á landsbyggðinni sé ofurselt stóriðjuvalkostum og byggðakvótum?

Ef við troðum virkjunum, línumöstrum og tengistöðvum niður allsstaðar þar sem æpt er “fólksflótti" seljum við ekki opineygðum ferðalöngum söguna um að Ísland sé frekar “Náttúrulega flott sjoppa". Þetta byggir á nákvæmlega sama lögmáli og hvalaskoðunarferðir á Húsavík þurfa að burðast með. Aukningin hjá þeim úr 2000 í 20.000 farþega á nokkrum árum er ævintýraleg. En hvað gerist eftir að við leyfðum hvalveiðar aftur. Hvað verður um þetta fyrirtæki?
Ekki það að ég sé á móti hvalveiðum né hvalkjöti en alþjóðasamfélagið með hormónabyggðu Bandaríkjamennina í fararbroddi er komið til að vera og það finnur til með hvölum. Þetta sama samfélag og krefst stöðlunar, samræmingar fjármagnsfrelsis og Náttúruverndar! Byggt á reynslu eigin eyðingar! Þetta sama samfélag og gerði ykkur íslensku stjórnmálamönnunum ókleift að falsa alltaf íslenska gengið nema lítillega. Hefur þú heyrt af þessu samfélagi Jón? Við erum jú alltaf að þykjast vera með í alþjóðlegu sjoppunni þannig að þú hlýtur að hafa allavega heyrt af þessu.

Eftir að þið settuð ÁlFinn í Seðlabankann til að hvíla sig (þó stutt hafi staðið við) stóð ég í þeirri meiningu að kannski sæjuð þið fleiri úrræði til að efla landsbyggðina en endalausar verksmiðjur. Finnst þér ekki eins og þetta gefi til kynna að hinn almenni Framsóknarmaður sé frekar hugmyndasnauður eða er það bara forystan sem er svona geld?

Þröngsýnir stjórnmálamenn eru óvelkomnir á Íslandi framtíðarinnar. Mannlegir, víðsýnir og þroskaðir einstaklingar sem setja langtímahagsmuni ofar flokkadráttum og skammtímalausnum, stundum óvinsælir, stundum hetjur er það sem við þurfum.

Vilji þjóðarinnar hefur komið fram í virkjanamálum. Það er meirihluti gegn ykkar stefnu í þessum málum. Samt ætlið þið að halda áfram að þumbast með þessi mál í gegn enda treystið þið því að pólitískt minni fólks sé skammt.

En hefur þú Jón velt fyrir þér út af hverju Ísland byggðist í byrjun. Hefðu forfeður okkar ekki bara haldið sig heima ef þeir hefðu haft vissu fyrir að við myndum enda sem slíkar andskotans alþjóðagungur sem byggjum afkomu okkar á erlendum auðhringjum?


Ef “Fólk í fyrirrúmi" snerist ekki um að félagslega kerfið okkar ætti að virka fyrir þá sem á því þarf að halda langar mig að vita hvaða fólk þú áttir við? Voru það allir félagar þínir sem eru búnir að tryggja sér góðan lífeyrir með því að vera titlaðir ráðherrar? Voru það austfirðingarnir sem þú ætlar að setja alla inn í kerskála gegn atkvæðunum þeirra?

Fólk í fyrirrúmi III

 Ef þessi ríkisstjórn spillingar og þjófnaðar hefði leyft skattleysismörkum að haldast í hendur við vísitölu væru skattleysismörkin um 140 þús. Þetta eru peningar sem ríkisstjórnin hefur stolið. Og barnabætur voru líka skertar þó verið sé að laga það fyrst núna.  Hlutdeild nemenda og sjúklinga í sínum málaflokki hefur aukist. Þetta eru allt staðreyndir sem þýðir ekki að stinga hausnum í sandinn yfir. Nema verandi Fransóknarspillingarbælisábúi. Ég get haldið lengi áfram um þessi mál. Árangur áfram - ekkert stopp á spillingunni en einfaldlega ekki að gera sig. Þið eigið eftir að svíkja loforðið um birtingarfé til kosninganna um mörg hundruð prósent og fela það með bókhaldsfiffum eins og alltaf vonandi að kjósendur hafi gullfiskaminni. Sem sumir þeirra hafa. Og sitja áfam við útbýttun bittlinga til kosningarstjóra og velunnara. Eða hvað er 6,3% maðurinn ykkar í Reykjavík búinn að starfa við frá þeim kosningum?

Að lokum vil ég mælast til þess að Framsóknarflokkurinn verði lagður til hinstu hvílu. Það er fyrir löngu orðin ólykt af hræinu.

Bákn með bumbu

Meðan Davíð Oddsson, Friðrik Sófusson og Þorsteinn Pálsson klæddust enn matrósarfötum og Hannes Hólmsteinn Gissurarason var að læra að ulla framan í fólk fundu þeir strákarnir upp slagorðið „Báknið burt“ að vísu með smá aðstoð frá mömmu Tatcher.

Töff slagorð sem svínvirkar ef maður bara hamrar nógu mikið á því.

Síðan hefur bæði mikið vatn, ófáir bankar og ríkisstofnanir hnigið til sjávar en báknið þeirra félaga fitnar og fitnar. Hvað veldur? Hver heldur um ríkistaumana? Hafa strákarnir barist við svona mikla andstöðu frá stjórnarandstöðunni?

Af hverju er íslenska embættiskerfið komið með bumbu? Nýjar stofnanir og græðlingar þeirra spretta upp með hverju skynsemisfrumvarpinu á fætur öðru og miðstýringin verður meiri og meiri. Við erum komin með samkeppnisstofnun sem gefur út vottorð til fyrirtækja um að það sé í flottu lagi að ráða yfir meira en 50% markaðarins ef viðkomandi fer bara pent með það.

Veiðistofnun refsar bændum fyrir að veiða mink ef þeir eru ekki með laminerað veiðikort í rassvasanum.

Byggðastofnun, gjörsamlega úrelt framsóknarfóstur drepur niður einkaframtakið í deyjandi byggðalögum með framlögum, kvóta og fjáraustri til þeirra sem skæla í réttum hópi, meðan þeir sem berjast sjálfir geta bara gert það áfram.

Einkavæðingafóstrið átti að skila þjóðinni auknu góðæri en situr nú uppi með endurgreiðslur ef ekki skaðabætur til þeirra er létu vélast.

Gjafakvótaeigendur berjast um yfirráð yfir bönkum og tryggingarfélögum og svona mætti áfram telja. Mjög lengi.

Á sama tíma lagðist heilbrigðiskerfið í rúmið með flensu þannig að sjúklingar þurfa að koma með lyf og hjálpartæki með sér á spítalann ásamt túlk eða einhverjum til að sjá um sig.

Menntakerfið okkar orðið sama geymslustofnunin og fóstrulausir leikskólarnir sem vilja ekki einu sinni sjá að krakkarnir mæti.

En það vantar ekki að hið opinbera borði matinn sinn. Embættismannakerfi sem búin eru til fyrir fólkið þe. almúgann eiga nefnilega eitt sameiginlegt hvar sem er í heiminum. Hvort sem við erum að tala um kommúníska alræðisstjórn Sovétríkjanna, meirihlutastjórn ANC í S-Afríku, Washington báknið eða heimóttarlega stjórnvisku bananalýðveldisins Íslands.

Það gerist það sama alls staðar. Kerfi sem er búið til sem þjónusta fyrir almenning þróast í það að almenningurinn verður til fyrir það. Þ.e.a.s til að kerfið virki þurfi það almenning, ekki að almenningur þurfi kerfi. Kerfið verður til fyrir sjálft sig eða þarfir hins opinbera og hagsmunir kerfisins ofar þörfum almennings.

Ráðherrar koma og fara en undirmenn þeirra eru naglfastir ásamt öðrum embættismönnum.

Kenningar og reglugerðir verða að guðs vilja meðan tilfinningar og almenn skynsemi hafa ekki vægi enda í engu getið á pappírum.

Báknið burt sungu þeir! Komum við þessari brussu einhverntímann út úr húsi?Meðan þetta sama bákn er notað sem verkfæri stjórnmálamanna til að hvítþvo samvisku sína og knýja í gegn hluti sem þeir vita jafnvel að er meirihlutaandstaða gegn hlýtur krafan að vera þessi, Báknið burt - með allri sinni bumbu, hvort sem er í formi aukins skrifræðis eða gerræðislegs hroka reglugerðarriddara sem í krafti embættisins knésetja almennan vilja og skynsemi.

Ástæða til að lesa....

Hér getur á að líta í hnotskurn útskýringu á valdaskiptakerfinu sem hefur verið við lýði hér frá ómunatíð. Gefið ykkur tíma í að lesa þessa grein:

"Á að selja Landsvirkjun?

Í tilefni af nýjustu fréttum um að Landsvirkjun verði seld nú strax eftir kosningar ef núverandi meirihluti heldur velli, þá birti ég hér fyrir neðan gamla grein frá mér um kerfi þeira ráðamanna um að selja sjálfum sér fyrirtæki ríkisins. Það kerfi heitir "Framsóknarfjósið"  og fjallar um hvernig menn skipta kökunni og hvernig núverandi meirihluti og bandalög á þeirra vegum starfa sem tvíhöfða fyrirbæri, annars vegar sem stjórnmálaflokkar og hinsvegar í einhverskonar bakdeildum sem sjá um að hirða eignir ríkisins."

Rest af grein: 

http://siggisig.blog.is/blog/siggisig/entry/195467/

Frelsi eða helsi?

Það vilja alllir láta sér líða vel en að gera það á kostnað morgundagsins skapar timburmenn. Íslenska leiðin er að bíta þar sem jaxlinn var, taka höfuðverkjatöflu og vinna yfirvinnu. Já og gleyma ekki að spila í Lottó. Er enginn að verða þreyttur á þessu bulli? Er bara ástæða til að gíra niður þegar bíllinn þinn er við að keyra aftan á næsta bíl á yfirfullum götum löngu sprungins gatnakerfisins? Vill enginn fara gír neðar í neyslukapphlaupinu?

Eigum við að hafa misvitra pólitíkusa með ráðgjöfum sínum í fermingarfötunum ásamt tölvutöffurum frjálshyggjufjármagnsins undir stýri þjóðarskútunnar?

Ómálefnaleg og oft á tíðum skynsemislaus umræða þar sem niðurstaða fæst með því hver átti flottasta sjóvið gegnsýrir ýmiss háalvarleg mál sem eru að skipta þjóðfélaginu okkar í tvennt.

Það virðist vera orðin lenska að ef hrokinn og fyrirlitningin í garð andstæðra raka séu sem mest hafir þú vinninginn. Það spyr enginn lengur hvað hjartað segir. Hvað er réttlæti og hver er tilfinningin fyrir betra mannlífi?

Er það réttlæti fyrir þá sem ekki eiga óveiddan fisk inná bankabók að aðrir eigi tugmilljónir í þorskhausum sem þeir hafa hvorki séð né viti hvort séu til.

Er það réttlæti gagnvart afkomendum okkar að eyða náttúruperlum fyrir hugarfóstur skammsýnna manna?

. Er það réttlæti að byggðalög leggist í auðn hvert af öðru af því að allur fiskkvóti er í höndunum á fjárfestingaraðilum? Ekki finnst fólkinu það sem horfir á börnin sín mennta sig og flytja í borgina vegna þess að heima er ekki lengur hægt að vera.

Er það réttlæti að reykvísk börn þekkja muninn á Segamega og Nintendo í smáatriðum en halda að kúin þarna sé þarna stærra dýrið þarna en beljan sko, öh! Börn sem eru í geymslu frá fæðingu gegn um leikskóla, forskóla, grunnskóla, menntaskóla og háskóla og koma út í umheiminn með gráðu í einhverju en mamma þvær enn þvottinn.

Segjum að ég hafi rangt fyrir mér, en er ekki íslenski veruleikinn að verða harðari, hraðari, ómanneskjulegri og meiri fjármagnstengdur. Hvers vegna er það ekki yfirlýst stefna íslendinga alveg eins og það að vilja ekki hafa her að náttúra okkar og land hafi forgang yfir atvinnuskyndilausnir?

Ein hallærislegasta setning sem ríksisstjórnin hefur sent frá sér kveður á um það að auðlindir hafsins séu sameign þjóðarinnar. Þessi sama eign er inn á efnahagsreikningum fyrirtækja og einstaklinga en hvorki ég né þú megum draga ýsur.

Ísland er bananalýðveldi fjármagns- og alþjóðasleikjuháttar. Þann stimpil höfum við ein áunnið okkur.

Meðan heimóttarlegur torfbæjarhugsunarháttur leigulýðs með Visakort og tilboðsmöguleika ræður ríkjum verðum við aldrei neitt annað en það sem við verðskuldum.

Aukaleikarar í spagettivestra.

 Þessi grein er 5 ára gömul en ég ákvað að láta hana vaða hér.

 

 Að lokum vil ég mælast til þess að Framsóknarflokkurinn verði lagður til hinstu hvílu. Það er fyrir löngu orðin ólykt af hræinu.

Á þetta að koma á óvart?

Auðvitað einkavinavæða þeir landsvirkjun ef stjórnin lafir. Finnur Ingólfsson og aðrir flokkseigendur Framsóknar gera samning um skiptingu Orkuveitunnar og Landsvirkjunar milli sín og bláu handarinnar, kolkrabbans, smokkkfisksins eða hvað þetta heitir nú. Þetta verður selt (lesist: gefið) með ábyrgðum þjóðarinnar sem kaupbæti. Og markaðssett þannig að með gróðanum verði hægt að byggja yfir blessuð börnin og leyft gamla fólkinu að búa saman en ekki aðskilin á elliheimilunum. Svo fer milljarður í fíkniefnavarnir. Og allir sáttir ekki satt? Er kannski einhver Deja-vu keimur af þessu?

 Að lokum vil ég mælast til þess að Framsóknarflokkurinn verði lagður til hinstu hvílu. Það er fyrir löngu orðin ólykt af hræinu.

 

Segir að byrjað sé að undirbúa sölu Landsvirkjunar

Fólk í fyrirrúmi?

 Framsókn útjaskaði slagorðinu Fólk í fyrirrúmi fyrir nokkrum árum síðan. Ég er loksins búinn að fatta hvaða fólk þetta var. Allir Framsóknarmenn!

Allavega ekki þetta fólk sem ég rakst á í upptalningu Bryndísar Ísoldar (http://bryndisisfold.blog.is/blog/bryndisisfold/)

 

"170 börn bíða eftir fyrstu komu á göngudeild BUGL, biðtími allt að eitt og hálft ár. 20-30 mikið veik börn bíða eftir innlögn.

Biðlistar aldraðra: 400 bíða í heimahúsum í brýnni þörf fyrir hjúkrunarrými og 900 í þvingaðri samvist með ókunnugum. 62 aldraðir sem lokið hafa meðferð bíða inná Landspítala eftir því að komast í varanleg hjúkrunarrými.

243 hjartasjúklingar eru á biðlista eftir hjartaþræðingu á LSH, þar af 54 sem hafa beðið lengur en í 3 mánuði. 53 bíða eftir opnum hjartaaðgerðum

170 til viðbótar bíða eftir öðrum hjartaaðgerðum og -rannsóknum.

276 börn með margvísleg þroskafrávik bíða eftir greiningu. Biðtími er allt uppí 3 ár. Greining er skilyrði fyrir því að þessi börn fái stuðning í skólum og aðra þjónustu.

50 geðfatlaðir á Landspítala bíða eftir varanlegri búsetu. Sumir hafa beðið í allt að 15 ár. Auk þess vantar búsetuúrræði fyrir 170 geðfatlaða til viðbótar. Að mati Geðhjálpar eru 60-70 geðfatlaðir á götunni!

256 sjúklingar bíða eftir liðskiptaaðgerðum á LSH og þar af hafa 138 beðið í meira en 3 mánuði.

242 aldraðir bíða eftir að komast í margs konar meðferð á öldrunarsviði LSH."

Og þetta er bara hluti af upptalningunni.

Árangur áfram - ekkert stopp! þýðir þá sennilega: Lengjum biðlistana!

Eða er ég bara ekki að skilja Framsóknarmenn?

 Að lokum vil ég mælast til þess að Framsóknarflokkurinn verði lagður til hinstu hvílu. Það er fyrir löngu orðin ólykt af hræinu.

 

 

 Grein í Víkurfréttum eftir Atla Gíslason sem allir sem unna landinu þurfa að lesa:

 

"Stóriðja eða dauði ?

Ríkisstjórnin hefur rekið einsleita og metnaðarlausu stóriðjustefna í þágu erlendra álauðhringja. Þessa stefnu vill ríkisstjórnin nú innsigla til framtíðar  með  öfugmælum um þjóðarsátt. Þjóðarsáttin þeirra felst í því að engin stóriðjuáform verði lögð á hilluna. Það þýðir meðal annars að náttúruperlan Þjórsá, gersemar í nágrenni hennar og lönd bænda verða eyðilögð með fyrirhuguðum virkjunum.

Þessi áform kalla á eignarnám og jafnvel afsal á þjóðlendum. Því fer fjarri að eignarnám í þágu fyrirhugaðra virkjana í Þjórsá uppfylli skilyrði stjórnarskrárinnar um almenningsþörf. Það er engin almenningsþörf á því að eyðileggja með óafturkræfum hætti náttúruperlur Þjórsár í þágu mengandi stóriðju, að eyðileggja Hellisheiðina með háspennulínum"

 

Greinin í heild sinni: http://www.vf.is/adsent/numer/30539/default.aspx 

 

Athyglisverður punktur!!!!

Rakst á þessa grein eftir Guðjón Jenson. Það skyldi þó aldrei vera að hann hefði rétt fyrir sér?

 

“Er spilling í íslenskum stjórnmálum?
Markaðsvæðing ódýrasta rafmagns í heiminum eins og átakið var nefnt á sínum tíma er orðið frægt í sögunni einkum fyrir þá léttúð að selja rafmagn mjög ódýrt til stóriðjunnar og jafnframt spilla stórlega hálendi landsins.

Í síðustu þingkosningum varði Framsóknarflokkurinn 100 milljónum í kosningaáróður sinn eða álíka hárri fjárhæð og allir hinir flokkanir saman! Á síðasta landsfundi Framsóknarflokksins sl. haust kom fram að kosningaskuldirnar höfðu verið greiddar og byrjað væri að safna fyrir næstu kosningar! Hvaðan skyldu Framsóknarflokknum berast allir þessir miklu fjármunir, fremur litlum stjórnmálaflokki á íslenska vísu? Flokkur þessi virðist eiga sér einungis eina hugsjón um þessar mundir: að álvæða landið milli fjalls og fjöru. Undanfarin misseri hefur iðnaðarráðherra farið mikinn í að boða landsmönnum glórulitla áltrú sína: í öllum landsfjórðungum á að efna til álvera, annaðhvort byggja ný ellegar stækka þau sem fyrir eru. Það er eins og frú Álgerður eins og margir eru farnir að nefna iðnaðarráðherrann, sé talsmaður stóru hluthafanna í áliðnaðinum. Áleitin spurning er hvort Framsóknarflokkurinn hafi notið góðs af allri þessari álvæðingu á Íslandi.

Miklar freistingar tengjast hugsanlegum fjárhagslegum ávinningi og glæfralegum ákvörðunum á borð við bjartsýnisvirkjunina eystra. Meðan Framsóknarflokkurinn hefur ekki gert hreint fyrir sínum dyrum og lagt spilin á borðið og gert þjóðinni minnstu grein fyrir hvaðan auður flokksins er kominn, þá er næsta víst að auðvelt sé að gera því skóna að fyrirtæki, þ.á m. í álframleiðslu moki stórfé í flokkinn.”

Greinin í heild sinni hér:

http://www.thjodarhreyfingin.is/birta_grein.php?id=459

Eru þessir menn á lyfjum?

http://gullistef.blog.is/blog/gullistef/#entry-192912

"Gaman að sjá hversu góður og öruggur Jón Sigurðsson formaður Framsóknarflokksins var í Kastljósinum nú í kvöld. Það er greinilegt að þarna fer maður sem hefur yfirgripsmikla þekkingu á sínu viðfangsefni. Hann svaraði öllum fyrirspurnum á skýran og góðan hátt, fyrirspyrjendur komu ekki að tómum kofanum hjá honum.  Hann kom vel til skila að áfram verði haldi á sömu braut í að bæta öll búsetuskilyrði okkar íslendinga. Hann var einstaklega rólegur og  kom mjög vel fyrir."

Iðnaðarráðherra sem enginn kaus en Framsókn skvetti framan í þjóðina verður seint sakaður um það að vera alþýðlegur eða maður fólksins. Það tinar af honum pirringurinn gagnvart öllum sem eru ekki jámenn hans. Ég efa það ekki að þarna fari gáfaður og vel lesinn maður. En það er óþarfi að afgreiða okkur hin öll sem fífl ef við leggjumst ekki á hnén og dýrkum hans boðskap. Og boðskapur hans í kastljósi var boðskapur þess sem veit og getur og þolir ekki mótbárur. Árangur áfram- ekkert stopp snýst um að setja sína menn í bitastæð embætti um ókomna tíð.

Slagorðasukk Framsóknar gegnum tíðina "milljarður í fíkniefnamál" "Fólk í fyrirrúmi". og núna "Áfram árangur - ekkert stopp!" hljómar um bæinn. Hversu margir láti glepjast af þessarri síbylju veit ég ekki en vona að verði sem fæstir.

Þeir í Sambandsflokknum hafa aldrei  litið til baka og sagt að kannski hafi ekki tekist sem skyldi. Enda er mjög auðvelt að rökstyðja milljarðinn í fíkniefnin þegar þú getur blaðrað um forvarnir, tollgæslu, fíkniefnahunda og eflda landamæragæslu (vegna EES samningsins) og allt virkar eins og Framsókn hafi staðið við sitt.

"Fólk í fyrirrúmi" var annað slagorðið og efni í aðra grein hér. En það er ljóst að sama hvað fólk kýs þá verða það eingöngu gullfiskaminniskjósendur sem merkja x við B.

 Að lokum vil ég mælast til þess að Framsóknarflokkurinn verði lagður til hinstu hvílu. Það er fyrir löngu orðin ólykt af hræinu.