Svín á silfurfati með epli í trýninu.

 32.345 eða drjátuogdvöhhhúsnddrjúhndrfjördiohfimm eins og það hljómaði frá stráknum á kassanum. Ég horfði á hálftóman Nóatúnsplastpokann aftur á strákinn og spurði: Hvað sagðirðu? Drjátuogdvöhhhúsnddrjúhndrfjördiohfimm endurtók hann og beið eftir að ég borgaði. Verandi svona geðgóður og rólyndur maður spurði ég gelgjuna hvað væri svona dýrt. Hann renndi yfir miðann og las upp. Kom að svínagúllasi á dudduguoháddahhusnundogeggvað. Kurteisislega benti ég honum á að miðað við þessa upphæð ætti ég að vera með feitan gölt á silfurfati fulleldaðan og með tilheyrandi epli í kjaftinum. Hann skildi mig ekki. Geðprýði mín beið nokkra hnekki þennan dag og drengurinn hefur sennilega snúið sér alfarið að tölvuleikjum.

Þessi uppákoma er ekkert einsdæmi. Ég hef keypt litla ananasdós sem kostar 50 kr. meira en sú stóra, verðið á hillu og við kassa eru gjörólík, engifer verður að hvítlauk osvfrv.

En eftir að ég komst að því hvað þessir krakkar eru með í laun hef ég ákveðið að steinhalda kjafti og tel þau vera í fullum rétti til að gera mistök. Raunar fullt af mistökum vegna þess að þeim er ekki greitt fyrir  að taka heilann með sér í vinnuna.

Þessi pæling spratt út frá grein Baldurs R.  "Viltu kvittun?"

 

Athugasemdir

[Steingrímur Helgason, 5.6.2007 kl. 23:44]

Ja,  fyrst að þú bara borgaðir & brostir í þágu verkalýðsbaráttunnar þá ætla ég nú bara rétt að vona að þetta tæplega 29þiðsundkalla svínagúllas hafi nú verið þokkalega ætur biti þér.

S.

[Anna Benkovic Mikaelsdóttir, 6.6.2007 kl. 16:15]

já svona er þetta nú og ekki fá unglingarnir hátt borgað...en þú fékkst leiðréttingu...er það ekki?

[Ævar Rafn Kjartansson, 6.6.2007 kl. 16:34]

Jújú gelgjan fékk aðstoð við að leiðrétta þetta.

[Valgerður Halldórsdóttir, 7.6.2007 kl. 19:04]

Ég sé þig í anda, geðprúðan að venju  

Þetta dæmi sem þú nefnir með það að það sé annað verð í hillu og en á kassa sýnir að neytendavernd og eftirlit er  mikilvægt. Ég verð að viðurkenna að ég les sjaldan kvittanir á kassa - og því tilvalið fórnarlamb svika og pretta 

Heiti því hinsvegar eftir þetta að bæta mig